**बार्शी तालुक्यात अवैध फटाके साठ्यावर पोलिस छापा; १.३४ लाखांचा माल जप्त, एकाला अटक**

**बार्शी तालुक्यात अवैध फटाके साठ्यावर पोलिस छापा; १.३४ लाखांचा माल जप्त, एकाला अटक** 

**KDM NEWS प्रतिनिधी**सोलापूर, ७ ऑक्टोबर : बार्शी तालुक्यातील घाणेगाव येथे वैराग ते पिंपरी रस्त्यालगतच्या पत्र्याच्या शेडमध्ये विनापरवाना शोभेच्या फटाक्यांचा मोठा साठा आढळल्याने पोलिसांनी छापा टाकून १ लाख ३४ हजार २५० रुपयांचा माल जप्त केला. या प्रकरणी दत्तनगर वैराग येथील अरुण अशोक मोहीते (वय ४७) याला अटक करण्यात आली आहे.

गोपनीय माहितीच्या आधारे उपविभागीय पोलिस अधिकारी अशोक सायकर यांच्या नेतृत्वाखालील पथकाने ३ ऑक्टोबर रोजी सायंकाळी ७ वाजता छापा टाकला. पथकात पोलिस हेडकॉन्स्टेबल भोंग, डाके, पोलिस कॉन्स्टेबल बोधले, बिंदे आणि चालक धोत्रे यांचा समावेश होता. दोन पंचांसमोर शेडची तपासणी केली असता विविध प्रकारचे फटाके आढळले. मोहीते यांच्याकडे कोणताही परवाना नव्हता.

जप्त करण्यात आलेल्या फटाक्यांचे तपशील पुढीलप्रमाणे :

- इलेक्ट्रिक फुलबाजे : १ बॉक्स (२०० पाकीटे), एकूण किंमत ४०,००० रुपये.

- बेबी रॉकेट : ३६० पाकीटे, एकूण किंमत ५४,००० रुपये.

- ग्राउंड चक्कर : १२ पाकीटे, एकूण किंमत ५,४०० रुपये.

- बास्केट बॉम्ब : ३० पिशव्या, एकूण किंमत ४,३५० रुपये.

- बटरफ्लाय : ३० बॉक्स, एकूण किंमत १२,००० रुपये.

- १२ शॉट : १० बॉक्स, एकूण किंमत १३,००० रुपये.

- बर्ड तोटा : ५ बंडल (७५ पाकीटे), एकूण किंमत १,५०० रुपये.

- आदली : ४० नग, एकूण किंमत ४,००० रुपये.

एकूण साठ्याची किंमत १,३४,२५० रुपये आहे. प्रत्येक प्रकारातून नमुने राखीव ठेवून उर्वरित माल सीलबंद करून जप्त करण्यात आला. वैराग पोलिस ठाण्यात पोलिस कॉन्स्टेबल किसन राजाराम कोलते यांच्या फिर्यादीवरून भारतीय विस्फोटक कायदा १८८४ कलम ५ आणि ९, तसेच भारतीय न्याय संहिता २०२३ कलम १२५ आणि २८८ अंतर्गत गुन्हा दाखल झाला आहे. हे कृत्य मानवी जीविताला धोका निर्माण करणारे आणि निष्काळजी असल्याचे फिर्यादीत नमूद आहे.

तपास अधिकारी सायकर म्हणाले, "दिवाळीपूर्वी अवैध फटाके साठ्यावर कारवाई सुरू आहे. सुरक्षेच्या दृष्टिकोनातून अशा घटनांना आळा घालण्यासाठी पोलिस सतर्क आहेत." मोहीते याला न्यायालयात हजर करण्यात येईल.

KDM NEWS प्रतिनिधी