**महाराष्ट्र शासनाकडून अतिवृष्टीग्रस्तांसाठी ३१,६२८ कोटींचे मोठे पॅकेज; शेतकरी, नागरिकांना थेट मदत**

**महाराष्ट्र शासनाकडून अतिवृष्टीग्रस्तांसाठी ३१,६२८ कोटींचे मोठे पॅकेज; शेतकरी, नागरिकांना थेट मदत** 

**KDM NEWS प्रतिनिधी**मुंबई, दि. ७ ऑक्टोबर २०२५ : राज्यभरातील २९ जिल्हे, २५३ तालुके आणि २,०५९ महसूल वर्तुळांतील ६८ लाख हेक्टर शेतीचे नुकसान भरून काढण्यासाठी मुख्यमंत्री देवेंद्र फडणवीस यांच्या नेतृत्वाखालील महाराष्ट्र शासनाने आज ३१,६२८ कोटी रुपयांचे सर्वसमावेशक मदत पॅकेज जाहीर केले. या पॅकेजमध्ये शेतकऱ्यांसाठी थेट रोख मदत, पिक विम्याची शिथिलता, घरगुती नुकसानभरपाई आणि शैक्षणिक सवलतीचा समावेश आहे. नुकसानग्रस्तांना दिवाळीपूर्वी बँक खात्यात रक्कम जमा करण्याचे आश्वासन शासनाने दिले असून, रब्बी हंगामासाठी शेतकऱ्यांना तात्काळ दिलासा मिळेल.

मंत्रिमंडळ बैठकीनंतर बोलताना मुख्यमंत्री फडणवीस म्हणाले, "अतिवृष्टीमुळे १ कोटी ४३ लाख हेक्टरपैकी ६८ लाख हेक्टर शेतीचे नुकसान झाले. हे पॅकेज राष्ट्रीय आपत्ती निधीच्या नियमांपलीकडे जाऊन शेतकऱ्यांना उभारी देणारे आहे. ४५ लाख विमादार शेतकऱ्यांना किमान ५,००० कोटींची विमा रक्कम मिळेल."

       * पॅकेजचे प्रमुख घटक :

- **मानवी नुकसानभरपाई** : मृतांच्या कुटुंबांना ४ लाख रुपये; जखमींना ७४ हजार ते २.५ लाख रुपये (जखमेच्या तीव्रतेनुसार).

- **घरगुती नुकसान** : घरातील भांडी, वस्तूंसाठी प्रतिकुटुंब ५,००० रुपये; कपडे, वैयक्तिक वस्तूंसाठी प्रतिकुटुंब ५,००० रुपये.

- **व्यावसायिक मदत** : नुकसानग्रस्त दुकानदार, टपरीधारकांना ५०,००० रुपये.

- **निवासस्थान पुनर्वसन** : डोंगरी भागातील पूर्णतः नष्ट झालेल्या पक्क्या घरांसाठी १.२० लाख; कच्च्या घरांसाठी १.३० लाख रुपये. अंशतः पडझड घरांसाठी ६,५०० रुपये; झोपड्यांसाठी ८,००० रुपये; जनावरांच्या गोठ्यांसाठी ३,००० रुपये. डोंगराळ भागातील घरांसाठी अतिरिक्त १०,००० रुपये.

- **पशुपालन मदत** : दुधाळ जनावरांसाठी ३७,५०० रुपये; ओढकाम जनावरांसाठी ३२,००० रुपये; कुक्कुटपालनासाठी प्रति कोंबडी १०० रुपये.

- **शेती नुकसान** : खरडलेल्या जमिनीसाठी प्रति हेक्टर ४७,००० रुपये थेट रोख मदत; मनरेगा अंतर्गत प्रति हेक्टर ३ लाख रुपये. कोरडवाहू शेतकऱ्यांना प्रति हेक्टर ३५,००० रुपये; सिंचित शेतकऱ्यांना ५०,००० रुपये किंवा अधिक. बियाणे व इतर खर्चासाठी प्रति हेक्टर १०,००० रुपये (एकूण ६,१७५ कोटी).

- **पाणी स्रोत** : खचलेल्या किंवा बाधित विहिरींसाठी प्रति विहीर ३०,००० रुपये.

- **इतर सवलती** : दुष्काळी क्षेत्रातील जमिनींना महसूल सवलत; पीक कर्ज पुनर्गठन; शेती कर्ज वसुलीला स्थगिती. शाळा-महाविद्यालय परीक्षा शुल्क माफी; रोहयो कामात शिथिलता; शेती पंप वीज जोडणी खंडित न करणे. अतिवृष्टीग्रस्त शेतकऱ्यांना तात्काळ १०,००० रुपये रोख मदत व धान्य वितरण.

उपमुख्यमंत्री एकनाथ शिंदे म्हणाले, "हे पॅकेज शेतकऱ्यांसोबत उभे राहण्याचे सरकारचे वचन आहे. विरोधकांच्या 'प्रतीकात्मक' टीकेच्या आडपेची न येता नुकसानग्रस्तांना न्याय मिळेल." पॅकेजमधील १०,००० कोटी केंद्राकडून, उर्वरित राज्य निधीतून मिळणार असून, दावे तपासून त्वरित वितरण केले जाईल.

KDM NEWS प्रतिनिधी