**बार्शी तालुक्यात पाणबुडी मोटारींच्या चोरीचा सुळसुळाट; १०७ जणांच्या तक्रारी, पोलिसांचा तपास संतगतीने**

**बार्शी तालुक्यात पाणबुडी मोटारींच्या चोरीचा सुळसुळाट; १०७ जणांच्या तक्रारी, पोलिसांचा तपास संतगतीने** 

*KDM NEWS प्रतिनिधी**बार्शी, २८ जून २०२५*: सोलापूर जिल्ह्यातील बार्शी तालुक्यातील कुसळंब गावात एकाच रात्री तब्बल १०७ शेतकऱ्यांच्या विहिरींमधील पाणबुडी मोटारी आणि केबल्स चोरीला गेल्याची धक्कादायक घटना उघडकीस आली आहे. या प्रकरणी बार्शी तालुका पोलीस ठाण्यात भारतीय न्याय संहिता (BNS) २०२३ च्या कलम ३०३(२) अंतर्गत गुन्हा दाखल करण्यात आला असून, पोलीस उपनिरीक्षक दिलीप विष्णू ढेरे यांच्या नेतृत्वाखाली तपास सुरू आहे.

**घटनेचा तपशील**:  

दिनांक २६ जून २०२५ रोजी सायंकाळी ६:०० वाजण्यापासून ते २७ जून २०२५ रोजी सकाळी ७:०० वाजण्यापर्यंतच्या कालावधीत ही चोरी घडल्याचे फिर्यादीत नमूद आहे. कुसळंब येथील शेतकरी संजय तुकाराम ठोंगे (वय ५०, व्यवसाय शेती) यांनी दिलेल्या फिर्यादीनुसार, त्यांच्या शेतातील गट नंबर ३८४ मधील विहिरीतून ५ एचपी CRI कंपनीची पाणबुडी मोटार आणि २० मीटर लांबीची केबल अज्ञात चोरट्यांनी चोरली. या मालमत्तेचे एकूण मूल्य १०,१०० रुपये आहे. संजय यांनी २६ जून रोजी सायंकाळी शेतातील सिताफळ बागेला पाणी देऊन घरी परतल्यानंतर दुसऱ्या दिवशी सकाळी विहिरीवर गेल्यावर मोटार आणि केबल गायब असल्याचे आढळले. पाईप आणि रस्सी कापलेली, तसेच बोर्डाशी जोडलेली केबलही गायब होती.

**इतर शेतकऱ्यांचे नुकसान**:  

संजय यांनी शेजारील शेतकऱ्यांशी संपर्क साधला असता, त्यांना समजले की, गावातील आणखी १०६ शेतकऱ्यांच्या विहिरींमधूनही ५ एचपी आणि ७.५ एचपीच्या पाणबुडी मोटारी आणि केबल्स चोरीला गेल्या आहेत. यामध्ये नागनाथ धोंडीबा ठोंगे, विकी शिवाजी ठोंगे, वसंत दगडू ठोंगे, अक्षय हरीभाऊ उकिरंडे, नंदा अनिल शिंदे, दिगंबर चक्रधर काशीद आणि शंकुतला कालिदास काशीद यांच्यासह इतर शेतकऱ्यांचा समावेश आहे. या सर्वांनी आपापल्या मालमत्तेची चोरी झाल्याची तक्रार नोंदवली आहे.

**पोलिसांचा तपास**:  

बार्शी तालुका पोलीस ठाण्यात २७ जून २०२५ रोजी रात्री ९:४७ वाजता फिर्यादी संजय ठोंगे यांनी लेखी तक्रार दाखल केली. तक्रारीत त्यांनी नमूद केले की, अज्ञात चोरट्यांनी मुद्दाम आणि लबाडीने त्यांच्या आणि इतर शेतकऱ्यांच्या मालमत्तेची चोरी केली. पोलीसांनी तक्रारीची नोंद घेऊन तात्काळ गुन्हा दाखल केला आहे. पोलीस उपनिरीक्षक दिलीप ढेरे यांनी सांगितले की, घटनास्थळाची पाहणी करण्यात आली असून, आसपासच्या परिसरात चौकशी सुरू आहे. तसेच, चोरीच्या मालमत्तेचा शोध घेण्यासाठी विशेष पथक तयार करण्यात येत आहे.

**परिसरात खळबळ**:  

कुसळंब गावात एकाच रात्री एवढ्या मोठ्या प्रमाणात चोरी होणे ही घटना परिसरात खळबळ उडवणारी आहे. शेतकऱ्यांनी व्यक्त केलेल्या चिंतेनुसार, पाणबुडी मोटारींची चोरी त्यांच्या शेतीच्या कामावर मोठा परिणाम करणारी आहे, कारण या मोटारी विहिरींमधून पाणी उपसण्यासाठी अत्यावश्यक आहेत. स्थानिक शेतकऱ्यांनी पोलिसांकडे तपासाला गती देण्याची आणि चोरट्यांना लवकरात लवकर पकडण्याची मागणी केली आहे.

KDM NEWS प्रतिनिधी