**श्री हनुमान विद्यामंदिर कव्हे येथे उत्साहात साजरा झाला आंतरराष्ट्रीय योग दिन**

**श्री हनुमान विद्यामंदिर कव्हे येथे उत्साहात साजरा झाला आंतरराष्ट्रीय योग दिन** 

**KDM NEWS प्रतिनिधी**बार्शी , दि. २१ जून २०२५: श्री हनुमान विद्यामंदिर, कव्हे येथे शनिवारी, २१ जून २०२५ रोजी आंतरराष्ट्रीय योग दिन मोठ्या उत्साहात साजरा करण्यात आला. सकाळी ७:३० वाजता प्रार्थनेनंतर इयत्ता पाचवी ते दहावीच्या २४२ विद्यार्थ्यांनी योगासने आणि प्राणायामाच्या विशेष सत्रात सहभाग घेतला. शाळेचे योग शिक्षक श्री. ठोंबरे यांच्या मार्गदर्शनाखाली हे सत्र यशस्वी झाले.

या कार्यक्रमात गतवर्षीच्या विभागीय योगा स्पर्धेत सहभागी विद्यार्थिनी स्वराली ठाकरे (इ. १० वी), आरती शिंदे (इ. ९ वी) आणि संस्कृती लोकरे (इ. ८ वी) यांनी योगासने व प्राणायामाची प्रात्यक्षिके सादर करून सर्वांना प्रेरित केले. सकाळी ७:४५ ते ९:१५ या वेळेत आयोजित सत्रात विद्यार्थ्यांना योगाचे शारीरिक आणि मानसिक फायदे समजावून सांगण्यात आले.

शाळेचे संस्थापक अध्यक्ष श्री. सिद्धेश्वर माने यांनी सर्व सहभागींचे कौतुक केले, तर मुख्याध्यापक श्री. बिडवे यांनी श्री. ठोंबरे यांचा पुष्पगुच्छ देऊन सत्कार केला. योगा स्पर्धेतील विद्यार्थिनींचाही यावेळी गौरव करण्यात आला. सर्व शिक्षक, शिक्षकेतर कर्मचारी यांनी उत्साहाने सहभाग नोंदवला.

मुख्याध्यापक श्री. बिडवे यांनी योगाला दैनंदिन जीवनाचा भाग बनवण्याचे आवाहन केले. शाळेच्या सर्व शिक्षक-शिक्षिकांच्या परिश्रमामुळे हा उपक्रम यशस्वी ठरला. विद्यार्थ्यांमध्ये योगाविषयी जागरूकता निर्माण करणारा हा कार्यक्रम सर्वांसाठी प्रेरणादायी ठरला.

KDM NEWS प्रतिनिधी