**खाजगी क्लासमध्ये अल्पवयीन मुलीचा विनयभंग; दोन प्राध्यापकांविरुद्ध गुन्हा दाखल**

**बीडमधील खाजगी क्लासमध्ये अल्पवयीन मुलीचा विनयभंग; दोन प्राध्यापकांविरुद्ध गुन्हा दाखल**

**KDM NEWS प्रतिनिधी**बीड, दि. 27 जून 2025: बीड शहरातील एका खाजगी कोचिंग क्लासमध्ये 17 वर्षीय अल्पवयीन विद्यार्थिनीचा दोन प्राध्यापकांनी विनयभंग केल्याची धक्कादायक घटना समोर आली आहे. या प्रकरणी शिवाजीनगर पोलिस ठाण्यात दो

न्ही प्राध्यापकांविरुद्ध पोक्सो कायद्यांतर्गत गुन्हा दाखल करण्यात आला आहे. फरार असलेल्या आरोपींचा शोध घेण्यासाठी विशेष तपास पथक स्थापन करण्यात आले आहे. या घटनेने बीड शहरात खळबळ उडाली असून, खाजगी कोचिंग क्लासेसमधील विद्यार्थ्यांच्या सुरक्षिततेचा प्रश्न ऐरणीवर आला आहे.

प्राप्त माहितीनुसार, पीडित मुलगी ही नीट परीक्षेची तयारी करण्यासाठी खरवंडी कासार येथील संत भगवान बाबा उच्च माध्यमिक महाविद्यालयात 11वीत शिकत असून, एप्रिल 2024 पासून उमा किरण कोचिंग क्लासेसमध्ये नीटच्या तयारीसाठी प्रवेश घेतला होता. तक्रारीनुसार, प्राध्यापक प्रशांत खटावकर आणि विजय पवार यांनी गेल्या काही महिन्यांपासून मुलीला एकटे असताना क्लासरूम आणि केबिनमध्ये बोलावून तिच्याशी अश्लील वर्तन केले. यामध्ये अनुचित स्पर्श, चुंबन घेणे आणि गुप्तांगांना स्पर्श करणे यासारख्या कृत्यांचा समावेश आहे. आरोपींनी मुलीला "घरी कोणाला सांगितले तर मारून टाकू" अशी धमकी दिल्याने ती घाबरून गप्प राहिली. मात्र, मानसिक त्रास असह्य झाल्याने तिने आपल्या मैत्रिणीला आणि नंतर पालकांना हा प्रकार सांगितला. त्यानंतर पालकांनी शिवाजीनगर पोलिस ठाण्यात तक्रार दाखल केली.

राज्य महिला आयोगाने या प्रकरणाची गंभीर दखल घेतली असून, पोलिसांना तातडीने कारवाईचे निर्देश दिले आहेत. आयोगाने कोचिंग क्लासचे सीसीटीव्ही फुटेज ताब्यात घेण्याचे, आरोपींची अटक होईपर्यंत इमारत सील करण्याचे आणि इतर विद्यार्थिनींकडून संवेदनशीलपणे तपास करून अशा तक्रारी असल्यास त्याची चौकशी करण्याचे आदेश दिले आहेत. तसेच, पीडित मुलीचे तिच्या कुटुंबासमवेत समुपदेशन करण्याच्या सूचनाही देण्यात आल्या आहेत. सध्या पीडित मुलगी तिच्या कुटुंबासोबत सुरक्षित आहे आणि तिला मानसिक आधार देण्यासाठी विशेष व्यवस्था करण्यात येत आहे.

पोलिसांनी तपासाला गती देत विशेष तपास पथक स्थापन केले आहे. पथकाचे नेतृत्व सहायक पोलिस निरीक्षक अतुल लांडगे करत असून, स्थानिक गुन्हे शाखेच्या तीन तपास पथकांनी आरोपींचा शोध सुरू केला आहे. पोलिस सूत्रांनुसार, सीसीटीव्ही फुटेज आणि इतर पुरावे गोळा करण्याचे काम सुरू आहे. तसेच, कोचिंग क्लासमधील इतर विद्यार्थ्यांशी संपर्क साधून त्यांच्याकडून माहिती घेण्याची प्रक्रिया सुरू आहे.

या घटनेमुळे खाजगी कोचिंग क्लासेसमधील सुरक्षिततेच्या उपाययोजनांवर प्रश्नचिन्ह उपस्थित झाले आहे. स्थानिक नागरिक आणि पालकांमध्ये संतापाची लाट पसरली असून, अशा घटनांना आळा घालण्यासाठी कठोर नियम आणि कडक कारवाईची मागणी होत आहे. पोलिसांनी लवकरात लवकर आरोपींना अटक करावी आणि पीडितेला न्याय मिळावा, अशी अपेक्षा व्यक्त होत आहे.

#BeedCrime #Maharashtra #WomenSafety