**जिल्हा सत्र न्यायालयाचा निकाल: सात वर्षांच्या जेल यातनांनंतर ढगे निर्दोषमुक्त**

**जिल्हा सत्र न्यायालयाचा निकाल: सात वर्षांच्या जेल यातनांनंतर ढगे निर्दोषमुक्त** 

**KDM NEWS प्रतिनिधी**कल्याण, 20 जून 2025: नाशिक येथील रहिवासी सहदेव रामचंद्र ढगे याला सात वर्षांच्या तुरुंगवासानंतर अखेर कल्याण जिल्हा सत्र न्यायालयाने बलात्कार आणि प्राणघातक हल्ल्याच्या आरोपातून निर्दोष मुक्त केले आहे. या निकालाने सहदेव आणि त्याच्या कुटुंबीयांना दिलासा मिळाला असला, तरी सात वर्षांच्या यातनांनंतर त्यांच्यासमोर अनेक प्रश्न उभे राहिले आहेत.

सहदेव ढगे हा कॅटरिंगचा व्यवसाय करणारा, शेतकरी कुटुंबातील तरुण. नाशिक येथे राहत असताना त्याची एका महिलेशी ओळख झाली. ही महिला सहदेवला आपला मुलगा मानत होती, तर तिची मुलगी त्याला भाऊ. सहदेवने या कुटुंबाला अनेकदा आर्थिक आणि इतर प्रकारे मदत केली होती. कालांतराने हे कुटुंब बदलापूरला स्थायिक झाले. एकदा सहदेव त्यांना भेटण्यासाठी गेला असता, या महिलेच्या मुलीने त्याच्यावर गंभीर आरोप लावले. तिने सहदेवने तिच्यावर प्राणघातक हल्ला करून बलात्कार केल्याची तक्रार बदलापूर पोलिस ठाण्यात नोंदवली.

या तक्रारीच्या आधारे बदलापूर पोलिसांनी सहदेवला तात्काळ अटक केली. त्याला जामीन मिळाला नाही आणि न्यायालयीन कोठडीत रवानगी झाली. शेतकरी कुटुंबातील असल्याने सहदेवकडे आर्थिक साधने मर्यादित होती. तरीही त्याचे कुटुंबीय सात वर्षे न्यायासाठी लढत राहिले. दरम्यान, सहदेवला तुरुंगात अनेक यातनांना सामोरे जावे लागले.

कल्याण जिल्हा सत्र न्यायालयात या प्रकरणाची सुनावणी न्यायाधीश एस. जी. इनामदार यांच्यासमोर झाली. सहदेवच्या वतीने एडवोकेट विलास पाटील आणि एडवोकेट प्रियेश सिंह यांनी बाजू मांडली. अंतिम सुनावणी दरम्यान तक्रारदार तरुणीने न्यायालयात दिलेली माहिती आणि पोलिसांना दिलेल्या जबाबात विसंगती आढळली. तसेच, तिच्या जखमांच्या दाव्याला समर्थन देणारा कोणताही ठोस पुरावा सादर झाला नाही. यामुळे न्यायालयाने सहदेवला निर्दोष ठरवत त्याची सुटका केली.

एडवोकेट प्रियेश सिंह यांनी सांगितले, “तक्रारदाराच्या माहितीत आणि पोलिस जबाबात तफावत होती. जखमांच्या दाव्याला पुराव्याचा आधार नव्हता. त्यामुळे न्यायालयाने सहदेवला निर्दोष मुक्त केले.” मात्र, सहदेव आणि त्याच्या कुटुंबीयांनी भोगलेल्या सात वर्षांच्या मानसिक आणि शारीरिक यातनांचे काय, असा प्रश्न उपस्थित होत आहे.

हा निकाल सहदेवच्या कुटुंबासाठी आनंदाचा क्षण असला, तरी त्यांना गमावलेले सात वर्षे आणि सामाजिक कलंक परत मिळणार नाही. या प्रकरणाने न्यायव्यवस्थेतील तपास यंत्रणेच्या कार्यक्षमतेवरही प्रश्नचिन्ह उपस्थित केले आहे. सहदेव आता आपले आयुष्य नव्याने सुरू करण्याचा प्रयत्न करत आहे, पण त्याच्या आणि त्याच्या कुटुंबाच्या जखमांना वेळ लागणार आहे.

KDM NEWS प्रतिनिधी