**बार्शी शहरात अल्पवयीन रिक्षा चालक, बेशिस्त स्कूल बस आणि रिक्षांवर कारवाईची मागणी**
**बार्शी शहरात अल्पवयीन रिक्षा चालक, बेशिस्त स्कूल बस आणि रिक्षांवर कारवाईची मागणी**
**KDM NEWS प्रतिनिधी**बार्शी: शहरातील रस्त्यांवर अल्पवयीन मुलांकडून रिक्षा आणि इलेक्ट्रिक बाइक चालवण्याचे प्रकार वाढल्याने वाहतूक सुरक्षेला धोका निर्माण झाला आहे. यासोबतच शाळा सुरू झाल्याने अनेक शाळा महाविद्यालयाच्या गाड्या आणि स्कूल बस बेशिस्तीमुळे नागरिक हैराण झाले आहेत. क्षमतेपेक्षा जास्त विद्यार्थ्यांना भरून, वाहतूक नियमांचे उल्लंघन करून गाड्या चालवणे, तसेच चालकांकडून दादागिरी करणे असे प्रकार वाढत असल्याने प्रादेशिक परिवहन कार्यालय (आरटीओ) आणि पोलीस विभागाने तातडीने कठोर कारवाई करावी, अशी मागणी नागरिकांकडून होत आहे.
शहरातील श्री शिवाजी महाविद्यालय रोड,तेल गिरणी चौक, बस स्टँड परिसर, परंडा रोड, उपळाई रोड यासारख्या प्रमुख रस्त्यांवर अल्पवयीन मुले रिक्षा आणि इलेक्ट्रिक बाइक बेदरकारपणे चालवताना दिसत आहेत. यामुळे वाहतूक कोंडी आणि अपघातांचे प्रमाण वाढले आहे. याशिवाय, शाळा सुरू झाल्याने रिक्षा आणि स्कूल बसमध्ये क्षमतेपेक्षा जास्त विद्यार्थ्यांना कोंबून वाहतूक केली जात आहे. अनेक चालक वाहन परवाना नसताना, कागदपत्रे अपूर्ण असताना किंवा गणवेश न घालता गाड्या चालवतात. यामुळे विद्यार्थ्यांचा जीव धोक्यात येत आहे. काही संस्थाचालकांच्या चालकांकडून रस्त्यावर गाड्या आडव्या लावणे, वाहतूक कोंडी होईल अशा पद्धतीने वाहने उभी करणे, तसेच इतर वाहनचालक आणि पादचाऱ्यांशी दादागिरी करणे असे प्रकार सर्रास घडत आहेत.
स्थानिक नागरिक पाटील म्हणाले, “अल्पवयीन मुलांना रिक्षा किंवा बाइक देणे आणि स्कूल बसमध्ये जास्त विद्यार्थ्यांना कोंबणे हे गंभीर आहे. यामुळे अपघातांचा धोका वाढतो. काही चालक रस्त्यावर गाड्या उभ्या करून वाहतूक कोंडी करतात आणि दादागिरीही करतात. आरटीओ आणि पोलिसांनी यावर कठोर कारवाई करावी.” तसेच, इलेक्ट्रिक बाइक आणि रिक्षांच्या बेदरकार चालवण्यामुळे रस्ता सुरक्षेला धोका निर्माण झाल्याचेही नागरिकांनी नमूद केले.
पंढरपूर येथे नुकत्याच झालेल्या पत्रकार परिषदेत जिल्हाधिकारी कुमार आशीर्वाद यांनी शासकीय कामात अडथळा निर्माण करणाऱ्यांविरुद्ध कठोर कारवाईचा इशारा दिला होता. याच धर्तीवर बार्शी शहरातही बेशिस्त रिक्षा चालक, अल्पवयीन वाहनचालक आणि स्कूल बस चालकांवर कारवाईची गरज आहे. विशेषत: शाळांच्या गाड्यांमधील अनियमितता आणि चालकांच्या दादागिरीवर आळा घालण्यासाठी प्रशासनाने तातडीने पावले उचलावीत, अशी मागणी जोर धरत आहे.
**नागरिकांची अपेक्षा**
नागरिकांनी प्रशासनाकडून खालील उपाययोजनांची अपेक्षा व्यक्त केली आहे:
1. अल्पवयीन चालकांना वाहन देणाऱ्या पालक आणि रिक्षा मालकांवर दंड आणि परवाना रद्द करण्याची कारवाई.
2. स्कूल बस आणि प्रतीक्षालयांच्या रिक्षांमध्ये क्षमतेपेक्षा जास्त विद्यार्थ्यांना बसवणाऱ्या चालकांवर कारवाई.
3. चालकांसाठी गणवेश आणि वाहन परवाना बंधनकारक करणे.
4. रस्त्यावर वाहतूक कोंडी निर्माण करणाऱ्या गाड्यांवर दंडात्मक कारवाई.
5. रिक्षा, इलेक्ट्रिक बाइक आणि स्कूल बसमधील नियमांचे उल्लंघन तपासण्यासाठी नियमित मोहीम.
6. रस्ता सुरक्षा आणि वाहतूक नियमांबाबत जनजागृती मोहीम.
या मागण्यांकडे प्रशासन लक्ष देईल आणि शहरातील वाहतूक सुरक्षित व सुव्यवस्थित होईल, अशी आशा नागरिकांना आहे.
KDM NEWS प्रतिनिधी
