**पंढरपुरात आषाढी वारीदरम्यान दुर्घटना: चंद्रभागा नदीत बुडून तरुण भाविकाचा मृत्यू**

**पंढरपुरात आषाढी वारीदरम्यान दुर्घटना: चंद्रभागा नदीत बुडून तरुण भाविकाचा मृत्यू** 

**KDM NEWS प्रतिनिधी**पंढरपूर, 20 जून 2025: आषाढी एकादशीच्या पार्श्वभूमीवर पंढरपूर येथे विठ्ठल दर्शनासाठी आलेल्या लाखो भाविकांमध्ये उत्साहाचे वातावरण असताना, आज एक दुर्दैवी घटना घडली. पुंडलिक मंदिराजवळील चंद्रभागा नदीत आंघोळीसाठी उतरलेल्या शुभम पावले (वय 27, रा. बेळगाव) या तरुण भाविकाचा पाण्यात बुडून मृत्यू झाला. या घटनेमुळे आषाढी वारीच्या उत्साहावर विरजण पडले असून, सर्वत्र हळहळ व्यक्त होत आहे.

मिळालेल्या माहितीनुसार, शुभम पावले आपल्या मित्रांसमवेत श्री विठ्ठल-रुक्मिणीच्या दर्शनासाठी पंढरपूरला आला होता. आज सकाळी तो चंद्रभागा नदीत स्नानासाठी उतरला. मात्र, पाण्याचा अंदाज न आल्याने तो पाण्यात बुडाला. या घटनेची माहिती मिळताच स्थानिक प्रशासनाने तात्काळ शोधकार्य सुरू केले. सुमारे चार तासांच्या अथक प्रयत्नांनंतर शुभमचा मृतदेह नदीतून बाहेर काढण्यात आला. ही घटना घडली तेव्हा प्रशासकीय यंत्रणा आषाढी वारीसाठी सज्ज असतानाही अशी दुर्घटना घडल्याने प्रश्नचिन्ह उपस्थित झाले आहेत.

**आषाढी वारीत वारकऱ्यांसाठी प्रशासन सज्ज**  

आषाढी एकादशीच्या निमित्ताने पंढरपूर येथे संत तुकाराम महाराज आणि संत ज्ञानेश्वर महाराज यांच्या पालख्या आज पुण्यात मुक्कामी आहेत. लाखो वारकरी टाळ-मृदुंगाच्या गजरात आणि ‘जय हरी विठ्ठल’च्या जयघोषात पंढरपूरच्या दिशेने मार्गस्थ झाले आहेत. पुणे शहर सध्या भक्तिमय वातावरणाने न्हाऊन निघाले आहे. वारकऱ्यांच्या सोयीसाठी पुणे महानगरपालिकेचा आरोग्य विभाग पूर्णपणे सज्ज आहे. पालख्यांच्या मुक्कामाच्या ठिकाणी 24 तास वैद्यकीय सेवा उपलब्ध करून देण्यात आली आहे. तसेच, यात्रेदरम्यान भाविकांसाठी चार तात्पुरती बस स्थानके उभारण्यात आली आहेत, ज्यामुळे प्रवास सुलभ होईल.

या दुर्घटनेमुळे प्रशासनाने नदीकाठच्या सुरक्षेबाबत अधिक सतर्कता बाळगण्याचे आवाहन केले आहे. चंद्रभागा नदीत स्नान करताना भाविकांनी खबरदारी घ्यावी, असेही प्रशासनाने सुचवले आहे. शुभमच्या मृत्यूमुळे त्याच्या कुटुंबीयांवर आणि मित्रांवर दुखाचा डोंगर कोसळला असून, वारकरी संप्रदायातही शोककळा पसरली आहे.

KDM NEWS प्रतिनिधी