**बार्शी भूषण डॉ. बबनराव यशवंतराव यादव यांचा भव्य नागरी सत्कार**

**बार्शी भूषण डॉ. बबनराव यशवंतराव यादव यांचा भव्य नागरी सत्कार** 

**KDM NEWS प्रतिनिधी**बार्शी, दि. ३१ जुलै २०२५** श्री शिवाजी शिक्षण प्रसारक मंडळाचे प्रेरणास्थान आणि कर्मवीर डॉ. मामासाहेब जगदाळे यांच्या विचारांचे खरे वारसदार, बार्शी भूषण डॉ. बबनराव यशवंतराव यादव यांच्या वैद्यकीय, शैक्षणिक आणि सामाजिक क्षेत्रातील अतुलनीय योगदानाबद्दल भव्य नागरी सत्काराचे आयोजन करण्यात येत आहे. सप्टेंबर २०२५ मध्ये होणाऱ्या या सोहळ्यासाठी बार्शीतील नागरिक सत्कार समितीच्या माध्यमातून एकत्र येत असून, महाराष्ट्रातील नामवंत व्यक्तीच्या हस्ते हा सत्कार संपन्न होणार आहे.

डॉ. बी. वाय. यादव यांचा जन्म वरकुटे (मूर्तीचे) या छोट्याशा खेड्यात अत्यंत गरीब आणि अशिक्षित कुटुंबात झाला. कर्मवीर मामासाहेब जगदाळे यांच्या बोर्डिंगमधून शिक्षण घेत त्यांनी मिरजेच्या वैद्यकीय महाविद्यालयातून एम.एस.पर्यंतचे शिक्षण पूर्ण केले. देश-विदेशात वैद्यकीय क्षेत्रात संधी उपलब्ध असताना, मामासाहेबांना दिलेल्या वचनानुसार त्यांनी बार्शीला परत येऊन सेवेचा वसा घेतला. १९८१ मध्ये मामासाहेबांचे महानिर्वाण झाल्यानंतर डॉ. यादव यांनी श्री शिवाजी शिक्षण प्रसारक मंडळाचे अध्यक्षपद सांभाळले. गेल्या ३४ वर्षांत त्यांनी संस्थेच्या सर्व शाखांना आधुनिक साधनसामग्री आणि भव्य इमारतींसह सुसज्ज केले. गुणवत्तेला प्राधान्य देत त्यांनी संस्थेचा लौकिक देशभर वाढवला.

वैद्यकीय क्षेत्रात डॉ. यादव यांनी बार्शीत आरोग्यमंदिर या सहा खाटांच्या छोट्या रुग्णालयापासून सुरुवात केली. आज त्याच रुग्णालयाचे रूपांतर ३५० खाटांच्या ट्रॉमा युनिटसह सुसज्ज ‘जगदाळे मामा हॉस्पिटल’मध्ये झाले आहे, जे परिसरात आरोग्यसेवेचा कणा बनले आहे. गोरगरीब रुग्णांना मोफत वैद्यकीय सेवा देणारे निष्णात सर्जन म्हणून त्यांची ख्याती आहे. त्यांच्या सेवाभावी वृत्तीने बार्शीतील अनेक सामाजिक संस्थांना मार्गदर्शन मिळाले. बार्शी कॅन्सर हॉस्पिटल, रामभाई शहा रक्तपेढी, भगवंत देवस्थान, इंडियन रेडक्रॉस सोसायटी यांसारख्या संस्थांच्या उभारणीत त्यांचा मोलाचा वाटा आहे.

वयाची ८० वर्षे पूर्ण केलेल्या डॉ. यादव यांच्या कार्याचा गौरव करण्यासाठी श्री शिवाजी शिक्षण प्रसारक मंडळाच्या पुढाकाराने नागरी सत्कार समिती स्थापन करण्यात आली आहे. या समितीचे स्वागताध्यक्ष डॉ. सुनीलकुमार लवटे, ज्येष्ठ विचारवंत, साहित्यिक आणि लेखक, यांनी तमाम बार्शीकरांना या सोहळ्यात सहभागी होण्याचे आणि आपले योगदान देण्याचे आवाहन केले आहे. “डॉ. यादव यांनी बार्शीच्या सामाजिक, शैक्षणिक आणि वैद्यकीय क्षेत्रात दिलेले योगदान अतुलनीय आहे. त्यांच्या प्रति कृतज्ञता व्यक्त करण्यासाठी हा सत्कार आहे,” असे डॉ. लवटे यांनी सांगितले.

सप्टेंबर २०२५ मध्ये होणारा हा सत्कार सोहळा बार्शीच्या इतिहासात एक मैलाचा दगड ठरणार असून, पंचक्रोशीतील नागरिकांनी या कार्यक्रमात मोठ्या संख्येने सहभागी होऊन डॉ. यादव यांच्या कार्याला मानवंदना द्यावी, असे आवाहन सत्कार समितीने केले आहे.

KDM NEWS प्रतिनिधी