**बनावट नोटांच्या टोळीला बार्शी न्यायालयाचा दणका: सात आरोपींना कठोर कारावास!**

**बनावट नोटांच्या टोळीला बार्शी न्यायालयाचा दणका: सात आरोपींना कठोर कारावास!** 

**KDM NEWS प्रतिनिधी**बार्शी, दि. २ ऑगस्ट २०२५** – तेलगिरणी चौकात बनावट नोटा खपवण्याचा प्रयत्न करणाऱ्या सात आरोपींना बार्शी सत्र न्यायालयाने कठोर शिक्षा सुनावली. सात वर्षांपासून दहा वर्षांपर्यंत कारावास आणि दंडाची शिक्षा ठोठावण्यात आली आहे.  

१९ जुलै २०२३ रोजी पोलिसांनी सुनिल कोथिंबीरे आणि आदित्य सातभाई यांना बनावट नोटांसह अटक केली. तपासात खादीर शेख, विजय वाघमारे, ललित होरा, नितीन बगाडे आणि जमीर सय्यद यांचा सहभाग उघड झाला. पोलिसांनी बनावट नोटा, प्रिंटर, स्कॅनर आणि साहित्य जप्त केले. नाशिक नोट छापखान्याने या नोटा बनावट असल्याचे प्रमाणित केले.  

न्यायालयाने सुनिल कोथिंबीरे, आदित्य सातभाई, खादीर शेख, विजय वाघमारे, नितीन बगाडे आणि जमीर सय्यद यांना प्रत्येकी सात वर्षे कारावास आणि २,००० रुपये दंड, तर ललित होरा याला दहा वर्षे कारावास आणि ५,००० रुपये दंडाची शिक्षा सुनावली. दंड न भरल्यास अतिरिक्त कारावास होईल.  

तपास अधिकारी ए.पी.आय. ज्ञानेश्वर उदार आणि पोलीस निरीक्षक बालाजी कुकडे यांनी सखोल तपास केला. सरकारी पक्षाची बाजू अॅड. दिनेश देशमुख यांनी यशस्वीपणे मांडली.  

हा निकाल अर्थव्यवस्थेला हानी पोहोचवणाऱ्या गुन्ह्यांविरुद्ध कठोर कारवाईचा संदेश देणारा आहे. पोलिसांनी नागरिकांना संशयास्पद व्यवहारांबाबत सतर्क राहण्याचे आवाहन केले आहे.

KDM NEWS प्रतिनिधी