**मुंबईत मनोज जरांगे यांचे उपोषण सुरू; आंदोलनाला शनिवारपर्यंत परवानगी**
**मुंबईत मनोज जरांगे यांचे उपोषण सुरू; आंदोलनाला शनिवारपर्यंत परवानगी**
**KDM NEWS प्रतिनिधी**मुंबई, २९ ऑगस्ट : मराठा आरक्षणाच्या मागणीसाठी आंदोलक मनोज जरांगे पाटील यांनी आज सकाळी मुंबईतील आझाद मैदानावर अनिश्चितकाळ उपोषण सुरू केले. सुरुवातीला सकाळी ९ ते संध्याकाळी ६ वाजेपर्यंतच परवानगी असली तरी मुंबई पोलिसांनी आता ही मर्यादा वाढवून उद्या शनिवारपर्यंत उपोषण करण्यास मंजुरी दिली आहे. ही माहिती सहपोलीस आयुक्त सत्यनारायण चौधरी यांनी दिली. या निर्णयामुळे आंदोलन अधिक तीव्र होण्याची शक्यता आहे.
जरांगे पाटील सकाळी ९:४५ च्या सुमारास हजारो समर्थकांसह आझाद मैदानावर पोहोचले. त्यांनी महाराष्ट्र सरकारवर आरक्षणाबाबत सहकार्य न करण्याचा आरोप करत म्हटले, "मी मरेल पण मागे हटणार नाही. आमच्या मागण्या पूर्ण होईपर्यंत मुंबई सोडणार नाही." त्यांनी समर्थकांना शांतता राखण्याचे आणि पोलिसांशी सहकार्य करण्याचे आवाहन केले. तसेच, अनावश्यक गर्दी टाळण्यासाठी गावी परतण्याचेही सांगितले.
मराठा समाजाला ओबीसी प्रवर्गात आरक्षण मिळवून देण्यासाठी कुणबी प्रमाणपत्र देण्याची मागणी जरांगे करत आहेत. हा त्यांचा गेल्या दोन वर्षांतील नववा मोर्चा आहे. सरकारने यापूर्वी १० टक्के आरक्षण दिले असले तरी ते ओबीसी अंतर्गत हवे असल्याचे ते म्हणतात. आंदोलनात ५ हजारांपेक्षा जास्त लोकांना परवानगी नाही, केवळ ५ वाहनांना प्रवेश आणि संध्याकाळी ६ नंतर मैदान रिकामे करण्याचे आदेश होते. मात्र, परवानगी वाढवल्याने आंदोलकांना दिलासा मिळाला.
या आंदोलनामुळे मुंबईत वाहतुकीला मोठा फटका बसला. ईस्टर्न फ्रीवे, सायन-पनवेल महामार्ग बंद करण्यात आले, तर सीएसएमटी परिसरात हजारो लोक जमा झाल्याने बस सेवा विस्कळीत झाली. पोलिसांनी १,५०० हून अधिक कर्मचाऱ्यांची तैनाती केली आहे. गणेशोत्सव सुरू असल्याने कायदा व सुव्यवस्था राखण्यासाठी विशेष खबरदारी घेण्यात येत आहे.
जरांगे यांनी सरकारला चेतावणी देत म्हटले, "सरकारने आम्हाला फसवले आहे. आता आरक्षण मिळालेच पाहिजे." दरम्यान, विरोधी पक्षांनी सरकारवर टीका करत तातडीने चर्चा करण्याची मागणी केली आहे. आंदोलन पुढे कसे वळण घेईल, याकडे सर्वांचे लक्ष लागले आहे.
KDM NEWS प्रतिनिधी
https://news.google.com/swg/js/v1/swg-basic.js
टिप्पण्या