**सोलापूरात प्रतिबंधित पानमसाला-तंबाखूचा काळाबाजार उध्वस्त! दोन पान शॉपवर छापा**

**प्रतिबंधित पानमसाला-तंबाखूचा काळाबाजार उध्वस्त! दोन पान शॉपवर छापा** 

**KDM NEWS प्रतिनिधी**कुर्डूवाडी प्रतिनिधी, २२ जुलै २०२५: सोलापूर ग्रामीण पोलिस आणि अन्न व औषध प्रशासनाने मंगळवारी कुर्डूवाडी (ता. माढा) येथील पंढरपूर चौकात दोन पान शॉपवर छापा टाकून ८,७८० रुपयांचा प्रतिबंधित पानमसाला, सुगंधित तंबाखू आणि मावा जप्त केला. दोन दुकान मालकांविरुद्ध अन्न सुरक्षा कायदा २००६ आणि भारतीय न्याय संहिता २०२३ अंतर्गत कुर्डूवाडी पोलिस ठाण्यात गुन्हा दाखल झाला आहे.  

अन्न सुरक्षा अधिकारी रेणुका पाटील (वय ३८) यांच्या फिर्यादीनुसार, महाराष्ट्र शासनाने १६ जुलै २०२५ च्या अधिसूचनेनुसार (क्र. असुमाअ/अधिसूचना-४११/२०२५/७) २० जुलै २०२५ पासून एक वर्षासाठी गुटखा, पानमसाला आणि सुगंधित तंबाखूच्या उत्पादन, साठवण, विक्रीवर बंदी घातली आहे.  

**आसरा पान शॉपवर धाड**  

सकाळी ११:४५ ते १२:३० दरम्यान, आसरा पान शॉपचे मालक सोहेल इक्बाल तांबोळी (वय ३५, रा. भांबरे वस्ती, भोसरे) यांच्या दुकानात तपासणी झाली. पंच साक्षीदार सुहास सरडे (वय २९) आणि नसरुद्दिन शेख (वय ४२) यांच्या उपस्थितीत २५ पुड्या हिरा पानमसाला (१२५ रुपये), २५ पुड्या रोयाल ७१७ तंबाखू (५० रुपये) आणि १ किलो सुगंधित तंबाखू (६०० रुपये) असा ७७५ रुपयांचा साठा जप्त केला.  

**जगदंबा पान शॉपवर कारवाई**  

दुपारी १२:१५ वाजता जगदंबा पान शॉपचे मालक सुनील माणिक जाधव (वय ३६, रा. गवळी वस्ती, कुर्डूवाडी) यांच्या दुकानात तपासणी झाली. येथे ४० पुड्या मावा (४०० रुपये), १२ बॉक्स डायरेक्टर पानमसाला (३,००० रुपये), ९ बॉक्स शॉट ९९९ तंबाखू (१,१२५ रुपये), ६ पाकिटे विमल पानमसाला (७२० रुपये), ६ पाकिटे वि-१ तंबाखू (१८० रुपये), ९ बॉक्स झूम झूम तंबाखू (१,३५० रुपये), ९ पुड्या रजनीगंधा (४५० रुपये) आणि १३ पाकिटे चंदन सुपारी (७८० रुपये) असा ८,००५ रुपयांचा साठा जप्त झाला.  

**कायदेशीर कारवाई**  

दोन्ही दुकानांतून नमुने घेऊन उर्वरित साठा जप्त केला. आरोपींनी साठा फेरीवाल्यांकडून खरेदी केल्याचे सांगितले, पण बिल सादर केले नाही. सोहेल तांबोळी आणि सुनील जाधव यांच्याविरुद्ध अन्न सुरक्षा कायद्याच्या कलम २६(२)(i), (ii), (iv), २७(३)(e), ३०(२)(a), नियमन ३.१.७, २.३.४ आणि बीएनएसच्या कलम १२३, २२३, २७४, २७५ अंतर्गत गुन्हा नोंदवला.  

**पुढील तपास**  

प्रतिबंधित साठ्याच्या पुरवठ्याबाबत तपास सुरू आहे. अन्न व औषध प्रशासन आणि पोलिस पथक अशा कारवाया तीव्र करणार असल्याचे रेणुका पाटील यांनी सांगितले. नागरिकांनी अशा बेकायदा विक्रीची माहिती प्रशासनाला कळवावी, असे आवाहन त्यांनी केले.

KDM NEWS प्रतिनिधी