**बार्शी शहर अंधारात आणि खड्ड्यांत: नगरपालिकेच्या निष्क्रियतेने नागरिक हैराण**

**बार्शी शहर अंधारात आणि खड्ड्यांत: नगरपालिकेच्या निष्क्रियतेने नागरिक हैराण** 

**KDM NEWS प्रतिनिधी**बार्शी, दिनांक २८ ऑगस्ट २०२५*सोलापूर जिल्ह्यातील बार्शी शहरातील रस्त्यांची दुरवस्था, बंद पडलेले पथदिवे, अनावश्यक गतिरोधक नागरिकांचे हाल बेहाल झाले आहेत. बार्शी नगरपालिकेच्या मुख्याधिकाऱ्यांनी शहराची पाहणी करून तातडीने उपाययोजना कराव्यात, अशी मागणी नागरिकांनी लावून धरली आहे. मात्र, प्रशासनाच्या ढिसाळ कारभारामुळे तक्रारींचे निराकरण होण्याऐवजी समस्यांचा डोंगर वाढत आहे.

**अनियोजित गतिरोधक: वाहनचालकांचा जीव टांगणीला**  

शहरातील अनेक रस्त्यांवर गरज नसताना बांधलेले गतिरोधक वाहनचालकांसाठी डोकेदुखी ठरत आहेत. परिसरातील गतिरोधक अनियोजित आणि अनेकदा अवाजवी उंचीचे आहेत. "गतिरोधकांमुळे दुचाकीस्वारांना कंबरदुखीचा त्रास होतोय, तर चारचाकी वाहनांचे नुकसान होत आहे," असे स्थानिक व्यापारी कदम यांनी सांगितले. गतिरोधक बांधण्यापूर्वी रस्त्यांचा अभ्यास आणि स्थानिकांची मते विचारात घेतली जात नसल्याचा आरोप आहे.  

**बंद पथदिव्यांनी अंधारलेले रस्ते**  

शहरातील अनेक भागांमध्ये पथदिवे बंद पडले असून, रात्रीच्या वेळी रस्ते अंधारात बुडाले आहेत. कुर्डूवाडी रोड, तुळजापूर रोड, सुभाषनगर आणि लातूर रोडवरील रस्त्यांवर गेल्या कित्येक दिवसापासून पथदिवे बंद आहेत. यामुळे रात्री प्रवास करणे असुरक्षित झाले असून, विशेषतः महिला आणि ज्येष्ठ नागरिकांमध्ये भीतीचे वातावरण आहे. "पथदिवे बंद असल्याने चोरी आणि गुन्हेगारी वाढण्याची शक्यता आहे," असे स्थानिक कार्यकर्ते जाधव यांनी नमूद केले.  

**खड्ड्यांनी बरबटलेले रस्ते**  

पावसाळ्यामुळे बार्शीतील रस्त्यांवरील खड्ड्यांचा प्रश्न गंभीर बनला आहे स्टेशन कुर्डूवाडी रोड,तुळजापूर रोडवरील खड्ड्यांमुळे वाहनचालकांना जीवघेणा प्रवास करावा लागत आहे. खड्ड्यांमध्ये साचलेल्या पाण्यामुळे अपघातांचा धोका वाढला असून, डासांचा प्रादुर्भाव वाढल्याने साथीच्या आजारांचा धोका निर्माण झाला आहे. "नगरपालिकेला तक्रारी करूनही कोणतेही काम होत नाही. करदात्यांचे पैसे कुठे जातात?" असा सवाल स्थानिक रहिवासी कुलकर्णी यांनी उपस्थित केला.  

**नगरपालिकेची उदासीनता: नागरिकांचा संयम सुटला**  

बार्शी नगरपालिकेच्या मुख्याधिकाऱ्यांनी शहराची पाहणी करून नागरिकांच्या तक्रारींचे निराकरण करावे, अशी मागणी गेल्या अनेक महिन्यांपासून केली जात आहे. मात्र, प्रशासनाकडून ठोस कारवाई होत नसल्याने नागरिक संतप्त झाले आहेत

KDM NEWS प्रतिनिधी