**लोणावळा टोलनाक्यावर मराठा आंदोलकांच्या वाहनांवर टोल आकारणी; संजय पारवेंनी केला आक्षेप, रक्कम परत**
**लोणावळा टोलनाक्यावर मराठा आंदोलकांच्या वाहनांवर टोल आकारणी; संजय पारवेंनी केला आक्षेप, रक्कम परत**
**KDM NEWS प्रतिनिधी** मराठा आरक्षणाच्या मागणीसाठी मनोज जरांगे पाटील यांच्या नेतृत्वाखालील आंदोलनाला पाठिंबा देण्यासाठी सोलापूर जिल्ह्यातून मुंबईच्या दिशेने निघालेल्या आंदोलकांच्या वाहनांना लोणावळा टोलनाक्यावर टोल आकारण्यात आला. या घटनेची माहिती मिळताच मराठा समाजाचे कार्यकर्ते संजय पारवे आणि त्यांच्या सहकाऱ्यांनी तातडीने हस्तक्षेप करून संबंधित टोल कर्मचाऱ्यांसोबत चर्चा केली आणि जोरदार आक्षेप नोंदवला.
या चर्चेनंतर टोलनाक्यावरील अधिकाऱ्यांनी चुकीची ओळख पटवून आंदोलकांच्या वाहनांवर आकारलेली टोल रक्कम तत्काळ रोख स्वरूपात परत केली. आंदोलकांच्या सुमारे १०-१५ वाहनांना याचा फटका बसला होता, ज्यांची एकूण रक्कम हजारोंच्या घरात होती. हे प्रकरण शांततेत निकाली निघाले असले तरी आंदोलनाच्या पार्श्वभूमीवर अशा घटना टाळण्यासाठी प्रशासनाने अधिक सतर्कता बाळगावी, अशी मागणी करण्यात आली.
संजय पारवे यांनी या प्रसंगी बोलताना सांगितले की, "आंदोलनाच्या काळात कोणत्याही आंदोलकाचा अन्याय होऊ नये यासाठी आम्ही सजग आहोत. जर कुणाच्या वाहनावर चुकून टोल आकारला गेला असेल, तर लगेच संबंधित विभागाशी संपर्क साधून रक्कम परत घ्या. मराठा समाजाच्या न्यायाच्या लढाईत अडथळे येऊ देणार नाही."
हे आंदोलन मनोज जरांगे पाटील यांच्या आवाहनानुसार राज्यभरात सुरू असून, हजारो आंदोलक मुंबईकडे कूच करत आहेत. लोणावळा टोलनाक्यासारख्या ठिकाणी वाहतुकीची गर्दी आणि ओळखण्यातील चूक यामुळे अशा घटना घडत असल्याचे सांगण्यात येत आहे. मात्र, आंदोलकांनी शांततापूर्ण मार्गाने आपली भूमिका मांडत टोल परत मिळवल्याने परिस्थिती नियंत्रणात राहिली.
KDM NEWS प्रतिनिधी
टिप्पण्या