**मुंबई पोलिसांकडून मराठा आरक्षण आंदोलकांना आझाद मैदानात एकदिवसीय उपोषणाची सशर्त परवानगी**

**मुंबई पोलिसांकडून मराठा आरक्षण आंदोलकांना आझाद मैदानात एकदिवसीय उपोषणाची सशर्त परवानगी** 

**KDM NEWS प्रतिनिधी**मुंबई, २७ ऑगस्ट : मराठा समाजाच्या आरक्षणासह विविध मागण्यांसाठी अंतरवली सराटी येथील आमरण उपोषणकर्त्यांना मुंबईतील आझाद मैदानात २९ ऑगस्ट रोजी सकाळी १० वाजता आंदोलन करण्याची सशर्त परवानगी देण्यात आली आहे. वरिष्ठ पोलीस निरीक्षक श्रीकांत आदाटे यांनी जारी केलेल्या पत्रात ही माहिती देण्यात आली असून, हे आंदोलन शांततामय राहण्यासाठी कठोर अटी घालण्यात आल्या आहेत.

महाराष्ट्र शासनाच्या २०२५ च्या सार्वजनिक सभा, आंदोलने आणि मिरवणुका नियमावलीनुसार ही परवानगी देण्यात आली आहे. यानुसार, आंदोलन फक्त एका दिवसासाठी मर्यादित असून, शनिवार-रविवार किंवा सुट्टीच्या दिवशी परवानगी नाही. आंदोलकांची कमाल संख्या ५,००० पर्यंत ठेवण्यात आली आहे, कारण मैदानाची क्षमता ७,००० चौरस मीटर इतकीच आहे. याच दिवशी इतर आंदोलकांनाही परवानगी असल्याने जागेची विभागणी करावी लागेल, असे पत्रात नमूद आहे.

वाहतुकीच्या नियमांनुसार, मुख्य आंदोलकांसोबत फक्त पाच वाहने मैदानात येतील, तर इतर वाहने वाडीबंदर, शिवडी किंवा कॉटनग्रीन येथे पार्क करावीत. आंदोलनाची वेळ सकाळी ९ ते सायंकाळी ६ पर्यंत असून, त्यानंतर मैदान रिकामे करावे लागेल. ध्वनीक्षेपक किंवा गोंगाट करणाऱ्या उपकरणांचा वापर परवानगीशिवाय बंदी आहे. मैदानात अन्न शिजवणे, कचरा टाकणे किंवा मोर्चा काढणे प्रतिबंधित आहे.

सार्वजनिक गणेशोत्सवाच्या पार्श्वभूमीवर, विसर्जनाच्या वेळी रहदारी किंवा धार्मिक भावनांना धक्का पोहोचणार नाही, याची दक्षता घेण्याचे निर्देश देण्यात आले आहेत. लहान मुले, गर्भवती महिला आणि वृद्धांना सहभागी न करण्याचे सांगण्यात आले आहे. मुंबई उच्च न्यायालयाच्या जनहित याचिका क्रमांक २५६५६/२०२५ मधील अंतरिम आदेशानुसार, आंदोलकांनी सर्व अटी पाळणे बंधनकारक आहे. सर्वोच्च न्यायालयाच्या अमित साहनी प्रकरणातील मार्गदर्शक तत्त्वांचाही उल्लेख करून, सामान्य जनजीवन आणि वाहतुकीला अडथळा होणार नाही, यावर भर देण्यात आला आहे.

अटींचे उल्लंघन झाल्यास आंदोलन बेकायदेशीर ठरवून कायदेशीर कारवाई होईल, असा इशारा देण्यात आला आहे. मराठा आरक्षण आंदोलनाची ही नवीन वळण असून, राज्य सरकारच्या अंमलबजावणीवर आंदोलकांचा भर आहे. यापूर्वी अंतरवली सराटी येथे झालेल्या उपोषणांनंतर हे मुंबईतील पहिले मोठे आंदोलन ठरणार आहे.

KDM NEWS प्रतिनिधी