**सोलापूरात अतिवृष्टीमुळे द्राक्ष बागांचे मोठे नुकसान, शासनाकडून तातडीने भरपाईचे आदेश**

**सोलापूरात अतिवृष्टीमुळे द्राक्ष बागांचे मोठे नुकसान, शासनाकडून तातडीने भरपाईचे आदेश** 

**KDM NEWS प्रतिनिधी**सोलापूर, ३० सप्टेंबर २०२५: सोलापूर जिल्ह्यात ऑगस्ट-सप्टेंबर २०२५ मध्ये झालेल्या अतिवृष्टीमुळे द्राक्ष पिकाचे प्रचंड नुकसान झाले आहे. सरासरी ४७५ मिमी पावसाच्या तुलनेत यंदा ६८५.१० मिमी, म्हणजेच १४४ टक्के जास्त पाऊस पडला. ९१ पैकी ८७ महसुली मंडळांत अतिवृष्टी नोंदली गेली, ज्यामुळे द्राक्ष बागांमध्ये पाणी साचून मुळांची कुज झाली आणि डाऊनी मिल्ड्यू, पावडरी मिल्ड्यू, करपा यांसारख्या रोगांनी पिकांचा नाश केला. यामुळे फळधारणा कमी होऊन उत्पादनात ३५ टक्क्यांहून अधिक घट अपेक्षित आहे.

जिल्ह्यात २० हजार हेक्टर द्राक्ष क्षेत्र असून, सीना आणि भीमा नदीकाठच्या बागा पाच दिवसांहून अधिक काळ पाण्याखाली राहिल्याने पूर्णतः उद्ध्वस्त झाल्या. कमी सूर्यप्रकाश, ७० टक्क्यांपेक्षा जास्त आर्द्रता आणि १० डिग्री सेल्सियसपेक्षा जास्त किमान तापमान यामुळे वेलींची परिपक्वता मंदावली, पानगळ झाली आणि अन्नद्रव्य शोषणाची क्षमता घटली. राष्ट्रीय द्राक्ष संशोधन केंद्र, पुणे येथील तज्ज्ञ डॉ. एस. डी. रामटेके आणि डॉ. पी. एस. निकुंबे यांनी जिल्हा आणि तालुका कृषी अधिकाऱ्यांसह केलेल्या पाहणीत हे निष्कर्ष नोंदवले.

जिल्हा अधीक्षक कृषी अधिकारी शुक्राचार्य भोसले यांनी २५ सप्टेंबरच्या पत्रात तालुका कृषी अधिकाऱ्यांना पंचनामे करून नुकसान भरपाईचा अहवाल सादर करण्याचे निर्देश दिले. शेतकरी, ग्रामपंचायती आणि लोकप्रतिनिधींच्या निवेदनांनुसार, अनेक शेतकरी आर्थिक संकटात सापडले आहेत. शासनाने खरीप पिकांसाठी मदत सुरू केली असून, द्राक्ष बागांसाठी विशेष पॅकेजची मागणी होत आहे. जिल्ह्यात ४७,२६६ हेक्टर पिकांचे नुकसान झाले असून, १.८६ लाख शेतकरी बाधित आहेत. शासनाने ३९३ कोटींची मदत मागितली असून, पंचनामे पूर्ण होताच भरपाई वितरणाला गती मिळेल.

KDM NEWS प्रतिनिधी