बार्शी - कर्तव्यनिष्ठ दिपाली गोरे यांना 'आदर्श मुख्याध्यापिका' पुरस्कार

*बार्शी - कर्तव्यनिष्ठ दिपाली गोरे यांना 'आदर्श मुख्याध्यापिका' पुरस्कार* 

*KDM NEWS प्रतिनिधी बार्शी, दि. २ फेब्रुवारी : के.एल.ई. सोसायटी, बेळगाव संचलित सिल्व्हर ज्युबिली बालक मंदिर विभागाच्या मुख्याध्यापिका सौ. दिपाली नितीन गोरे यांना स्वामिनी बहुउद्देशीय सामाजिक संस्था, महाराष्ट्रच्या वतीने 'आदर्श मुख्याध्यापिका' पुरस्काराने सन्मानित करण्यात आले. संस्थेच्या सचिव नेहा विक्रांत पवार यांच्या हस्ते हा पुरस्कार प्रदान करण्यात आला. यावेळी पुनम वासकर, भारती चोपडे, तेजश्री स्वामी आणि दिपाली कळसकर उपस्थित होत्या.

प्राथमिक शिक्षिका म्हणून शिक्षण सेवेत प्रवेश करून मुख्याध्यापिका पदापर्यंत पोहोचलेल्या दिपाली गोरे यांचा प्रवास प्रेरणादायी आहे. भगवद्गीतेच्या 'कर्मण्येवाधिकारस्ते मा फलेषु कदाचन' या श्लोकानुसार फळाची अपेक्षा न करता कर्म करत राहण्याच्या तत्त्वाने त्या कार्यरत आहेत. त्यांच्या गुणवत्तापूर्ण आणि प्रेरक कार्याने त्यांनी आदर्श शिक्षिकेची ओळख निर्माण केली आहे.

गेल्या पाच वर्षांत बालक मंदिर विभागात विविध उपक्रमांद्वारे बालकांना घडवण्याचे काम त्यांनी केले. शाळेला बालकांचे दुसरे घर बनवण्यात त्यांचा वाटा मोठा आहे. प्रेमळ, आपुलकीपूर्ण आणि शिस्तप्रिय स्वभावाने विद्यार्थ्यांशी जिव्हाळ्याचे नाते जोडत त्या शिक्षणाबरोबरच संस्कारांवर भर देतात. नर्सरी ते मोठ्या गटातील विद्यार्थ्यांसाठी महापुरुषांच्या जयंती आणि पुण्यतिथी साजऱ्या करून त्यांच्या विचारांचे संस्कार रुजवतात. लहान वयात राष्ट्रभक्ती, सामाजिक जाणीव आणि नैतिक मूल्यांची पेरणी करण्यात त्यांचा प्रयत्न उल्लेखनीय आहे.

वर्षभरातील सण, परंपरा आणि त्यांचे शैक्षणिक महत्त्व समजावून सांगण्यासाठी अभिनव उपक्रम राबवले. पारंपरिक मैदानी खेळ शिकवून शारीरिक विकासासोबत सांस्कृतिक वारसा जपला. या उपक्रमांनी बार्शी शहर आणि तालुक्यातील अनेक शाळांमध्ये सकारात्मक बदल घडले.

सामाजिक जबाबदारी जपत, अतिवृष्टी आणि ढगफुटीमुळे बाधित मांडेगावातील पूरग्रस्त कुटुंबांना धान्यरूपाने मदत केली. अंगणवाडीतील मुलांना शैक्षणिक साहित्य वाटप करून 'मदत नव्हे, कर्तव्य' ही भावना जपली. या कार्यामुळे सिल्व्हर ज्युबिली बालक मंदिर विभागाचे नाव सोलापूर जिल्ह्यात गौरवाने घेतले जाते.

के.एल.ई. सोसायटीच्या वर्षाताई ठोंबरे-झाडबुके आणि माजी मुख्याध्यापक प्रशांत कोल्हे यांच्या मार्गदर्शनात शैक्षणिक सेवा अधिक सक्षम केली. कला अविष्कार अकॅडमीद्वारे कराटे, नृत्य, रायफल शूटिंग, तलवारबाजी यांसारख्या क्रीडा आणि कला प्रकारांतून गुणवान विद्यार्थी घडवले.

उपक्रमशीलता, विद्यार्थीप्रिय स्वभाव आणि पालकांचा विश्वास या त्रिसूत्रीवर आधारित कार्यशैलीमुळे त्या 'दिपाली गोरे - आदर्श मुख्याध्यापिका' म्हणून ओळखल्या जातात. शिक्षण, संस्कार आणि समाजसेवेचा संगम साधून त्या बार्शीच्या शिक्षण क्षेत्रासाठी दीपस्तंभ ठरल्या आहेत.

KDM NEWS प्रतिनिधी