**बार्शी तालुक्यात छत्रपती शिवाजी महाराज महसूल समाधान शिबीर; ७ मार्चला आगळगाव-पांगरी मंडळात विविध सेवा**

*बार्शी तालुक्यात छत्रपती शिवाजी महाराज महसूल समाधान शिबीर; ७ मार्चला आगळगाव-पांगरी मंडळात विविध सेवा*

*KDM NEWS प्रतिनिधी बार्शी, दि. ५ मार्च : महसूल विभागाच्या वतीने राज्यभर राबवण्यात येणाऱ्या छत्रपती शिवाजी महाराज महसूल समाधान शिबीर अभियानाच्या पहिल्या टप्प्यात बार्शी तालुक्यातील ग्रामीण भागातील नागरिकांच्या दैनंदिन महसूल समस्या सोडवण्यासाठी विशेष शिबीराचे आयोजन करण्यात आले आहे. या अभियानाचा उद्देश शेतकरी, विद्यार्थी, महिला आणि सर्वसामान्यांना महसूलाशी निगडित तक्रारी तात्काळ निकाली काढणे आणि प्रशासन अधिक लोकाभिमुख बनवणे असा आहे. पहिल्या टप्प्यात ७ मार्च २०२६ रोजी सकाळी ९ ते संध्याकाळी ५ या वेळेत आगळगाव आणि पांगरी मंडळांमध्ये हे शिबीर भरविण्यात येणार आहे.

महसूल विभागाने दिलेल्या माहितीनुसार, या शिबिरात प्रलंबित फेरफार निकाली काढणे, अभिलेख दुरुस्ती डेस्कद्वारे जुन्या नोंदींचे सुधारण, लोकसेवा हक्क कायद्यांतर्गत उत्पन्न, रहिवासी, आदिवासी, जाती आणि नॉन-क्रिमी लेयर प्रमाणपत्रांची तात्काळ वितरण ही सेवा उपलब्ध होणार आहेत. तसेच, भूसंपादन आणि अकृषक परवानगी प्रकरणांतील कमी-जास्त पत्रके तयार करून गाव दप्तर अद्ययावत करण्याची सुविधाही देण्यात येईल. नागरी सुविधांसाठी एक खिडकी योजना, ई-मोजणी, अॅग्रीस्टॅक पोर्टलद्वारे शेती नोंदींचे एकीकरण, पीएम किसान योजनेची नोंदणी व लाभ वाटप, तक्रार निवारण आणि इतर विभागांच्या शासकीय योजनांचा लाभ घेण्यासाठी मार्गदर्शन अशा एकूण १० सेवा नागरिकांना मिळणार आहेत.

बार्शी तहसीलदार एफ आर शेख यांनी सांगितले, "हे अभियान महसूल प्रशासनाला अधिक गतिमान आणि जनमित्र बनवण्यासाठी महत्त्वाचे आहे. ग्रामीण भागातील शेतकऱ्यांना भूसंपादन आणि फेरफारासारख्या गुंतागुंतीच्या प्रक्रिया सोप्या करणे हा मुख्य हेतू आहे. नागरिकांनी या शिबिराचा लाभ घेऊन आपल्या प्रलंबित कामांची पूर्तता करावी." या अभियानाची अंमलबजावणी जिल्हा स्तरावरून तालुका आणि मंडळ पातळीवर केली जात असून, बार्शी तालुक्यातील नागरिकांसाठी हे पहिले शिबीर असल्याने मोठ्या संख्येने सहभाग अपेक्षित आहे.

या शिबिरामुळे ग्रामीण भागातील महसूल कार्यालयांना भेट देण्याची गरज कमी होईल आणि तक्रारींचे प्रमाण घटेल, असे विभागीय अधिकाऱ्यांचे मत आहे. नागरिकांनी आपले आवश्यक कागदपत्रांसह उपस्थित राहावे, जेणेकरून सेवा तात्काळ मिळेल.

KDM NEWS प्रतिनिधी