**बार्शी : शेअर बाजारात दरमहा १० टक्के नफ्याच्या आमिषाने डॉक्टरची ५२ लाखांची फसवणूक**

**बार्शी : शेअर बाजारात दरमहा १० टक्के नफ्याच्या आमिषाने डॉक्टरची ५२ लाखांची फसवणूक** 

**KDM NEWS प्रतिनिधी बार्शी**बार्शी शहर पोलिस ठाण्यात दाखल झालेल्या फिर्यादीनुसार, बार्शीतील चौधरी हॉस्पिटलचे डॉक्टर मिलिंद बिभीषण चौधरी (वय ३९, रा. फुले प्लॉट, उपळाई रोड, बार्शी) यांची ५५ लाख रुपयांची गुंतवणूक करून केवळ ३ लाख रुपये परत करून उर्वरित ५२ लाखांची फसवणूक केल्याचा गंभीर प्रकार समोर आला आहे. फसवणूक करणारा आरोपी संदीप दिलीप वायचळ (रा बार्शी, ) हा स्थानिक इन्कम टॅक्स सल्लागार असल्याचे फिर्यादीत म्हटले आहे.

डॉ. मिलिंद चौधरी यांनी ७ एप्रिल २०२६ रोजी दिलेल्या फिर्यादीत सविस्तर माहिती दिली आहे. त्यानुसार, आरोपी वायचळ हे इन्कम टॅक्स भरण्याचे काम करत असल्याने चौधरी यांची ओळख झाली होती. वायचळ यांनी डॉक्टरांना सांगितले की, “मी शेअर मार्केटमध्ये पैसे गुंतवतो आणि दोन-तीन महिन्यात दुप्पट-तिप्पट नफा कमावतो. तुम्ही माझ्याकडे पैसे गुंतवा, मी दरमहा १० टक्के नफा देतो.” 

वायचळ यांनी आपल्या कुर्दुवाडी रोड, अध्यापक कॉलनी येथील ऑफिसमध्ये बोलावून कॉम्प्युटरवर ट्रेडिंग दाखवली. त्यावेळी डॉ. चौधरी यांच्यासोबत हॉस्पिटलमधील ओंकार संजीवन पारडे व संदीप हणुमंत गव्हाणे हे उपस्थित होते. त्यांच्यासमोरच सर्व बोलणे झाले. यामुळे डॉक्टरांचा आरोपीवर पूर्ण विश्वास बसला.

**फसवणुकीची रक्कम आणि तारखा :**  

- १३ जानेवारी २०२२ रोजी डॉ. चौधरी यांच्या अ‍ॅक्सिस बँक (बार्शी) खात्यातून आरोपीच्या अ‍ॅक्सिस बँक खात्यात ५ लाख रुपये पाठवले.  

- २२ एप्रिल २०२२ रोजी ५ लाख आणि २५ एप्रिल २०२२ रोजी आणखी ५ लाख असे एकूण १० लाख रुपये पुणे येथील ‘एटम स्टॉक ब्रोकर’ कंपनीच्या खात्यात पाठवले.  

- नंतर वायचळ यांनी ‘मोनार्क’ ट्रेडिंग अ‍ॅपचा ब्रोकर असल्याचे सांगून ४० लाख रुपये गुंतवण्यास सांगितले. डॉक्टरांकडे रोख रक्कम नसल्याने त्यांनी एचडीएफसी बँक (बार्शी) येथून ४९,५९,४९९ रुपयांचे वैयक्तिक कर्ज काढले आणि २६ एप्रिल २०२२ रोजी आरटीजीएसद्वारे मोनार्क अ‍ॅपच्या खात्यात ४० लाख रुपये जमा केले.  

एकूण ५५ लाख रुपये गुंतवले. ४ मे २०२२ रोजी मोनार्क अ‍ॅपद्वारे आरोपीने ३ लाख रुपये परत पाठवले. यामुळे डॉक्टरांचा विश्वास आणखी वाढला. नंतर वायचळ यांनी पैसे देणे बंद केले. पैसे मागितल्यावर उडवाउडवीची उत्तरे दिली. शेवटी पैसे मागितल्यास “आत्महत्या करेन आणि तुला केसमध्ये गुंतवेन” अशी धमकी दिली.

डॉ. चौधरी यांनी फिर्यादीत स्पष्ट केले की, “सर्व व्यवहार ओंकार पारडे व संदीप गव्हाणे यांच्या समोरच झाले आहेत. मी आजपर्यंत ५५ लाख रुपये दिले, केवळ ३ लाख परत मिळाले. उर्वरित ५२ लाख रुपये परत मिळवण्यासाठी फिर्याद दाखल केली आहे.”

बार्शी शहर पोलिस ठाण्यात ही फिर्याद दाखल करून गुन्हा क्र. ०२५०/२०२६ नोंदवला आहे. भारतीय दंड संहिता कलम ४२० , ४०६ , ४०९ आणि ५०६  तसेच महाराष्ट्र ठेवीदारांच्या (वित्तीय संस्थांमधील हितसंबंधाचे संरक्षण) अधिनियम, १९९९ अंतर्गत गुन्हा दाखल करण्यात आला आहे. 

पोलिस उपनिरीक्षक महेश गळगटे यांच्याकडे तपास सोपवण्यात आला आहे. आरोपीविरुद्ध लवकरात लवकर कारवाई करण्याची मागणी डॉक्टरांनी केली आहे.

KDM NEWS प्रतिनिधी