**बारामतीत बिनविरोधची स्वप्ने धुळीला मिळाली! करुणा मुंडे आणि अभिजीत बिचुकले यांच्या उमेदवारीने महायुतीला मोठे आव्हान**

**बारामतीत बिनविरोधची स्वप्ने धुळीला मिळाली! करुणा मुंडे आणि अभिजीत बिचुकले यांच्या उमेदवारीने महायुतीला मोठे आव्हान** 

**KDM NEWS प्रतिनिधी बारामती :** दिवंगत उपमुख्यमंत्री अजित पवार यांच्या निधनानंतर बारामती विधानसभा पोटनिवडणुकीत अचानक राजकीय समीकरणे बदलली आहेत. धनंजय मुंडे यांच्या पत्नी करुणा मुंडे यांनी स्वराज्य शक्ती सेना पक्षाच्या तिकिटावर तर बिग बॉस फेम अभिजीत बिचुकले यांनी अपक्ष उमेदवारी अर्ज दाखल केल्याने महायुतीसमोर मोठे आव्हान उभे राहिले आहे. 

५५ उमेदवारांनी नामनिर्देशन अर्ज दाखल केले होते. छाननीनंतर ५३ उमेदवार रिंगणात आहेत. यात २३ स्थानिक आणि २६ बाहेरील (दौंड, इंदापूर, सोलापूर, सातारा, सांगली, नाशिक, ठाणे, बीड आदी ठिकाणचे) उमेदवार आहेत. महायुतीकडून उपमुख्यमंत्री सुनेत्रा पवार यांचा उमेदवार म्हणून बिनविरोध निवड होण्याची चर्चा होती. मात्र करुणा मुंडे आणि अभिजीत बिचुकले यांच्या एंट्रीमुळे मतविभाजनाची शक्यता निर्माण झाली आहे. 

करुणा मुंडे यांनी बारामतीत विकास झाला नाही, लोकांना खरा पर्याय देण्यासाठी उभे राहिल्याचे स्पष्ट केले. पवार कुटुंबीयांवर टीका करताना त्यांनी लोकशाही वाचवण्यासाठी ही लढाई असल्याचे सांगितले. अभिजीत बिचुकले हे साताऱ्यातील नेते, जे राष्ट्रपतीपासून सरपंचपदापर्यंत विविध निवडणुका लढवण्यासाठी ओळखले जातात. त्यांनीही अपक्ष उमेदवारी जाहीर केली. 

महायुतीला आता ९ एप्रिलपर्यंत (माघार मुदत) या दोन्ही उमेदवारांसह इतरांना अर्ज मागे घेण्यासाठी मोठी कसरत करावी लागणार आहे. २०२४ च्या विधानसभा निवडणुकीत ४६ अर्ज दाखल झाले होते, त्यात २३ उमेदवार रिंगणात राहिले होते. यावेळी मात्र उमेदवारांची संख्या अधिक असल्याने बिनविरोध होण्याची शक्यता कमी झाली आहे. 

राष्ट्रवादी (शरद पवार गट)ने निवडणूक लढवण्यास नकार दिला असून काँग्रेसने आकाश मोरे यांना उमेदवारी दिली आहे. महायुतीचे नेते एकनाथ शिंदे, चंद्रशेखर बावनकुळे यांनी काँग्रेसला उमेदवारी मागे घेण्याचे आवाहन केले आहे. 

बारामतीत ३ लाख ८३ हजार ७६७ मतदार आहेत. बिनविरोध न झाल्यास २३ एप्रिलला मतदान आणि ४ मे रोजी मतमोजणी होणार आहे. करुणा मुंडे आणि बिचुकले यांच्या उमेदवारीमुळे महायुतीचे नेते सध्या अर्ज मागे घेण्याच्या प्रयत्नात आहेत. याचा थेट परिणाम आगामी निवडणुकीवर होण्याची शक्यता राजकीय वर्तुळात व्यक्त केली जात आहे.

KDM NEWS प्रतिनिधी