**संविधान दिनाला बार्शीत उत्साहाचे वातावरण; बी.पी. सुलाखे महाविद्यालयात युवकांना लोकशाहीची शपथ**

**संविधान दिनाला बार्शीत उत्साहाचे वातावरण; बी.पी. सुलाखे महाविद्यालयात युवकांना लोकशाहीची शपथ** 

**KDM NEWS प्रतिनिधी**बार्शी, दि. २६ नोव्हेंबर : भारतीय संविधानाच्या ७६ व्या वर्धापन दिनानिमित्त शहरातील बी.पी. सुलाखे कॉमर्स महाविद्यालयात राष्ट्रीय सेवा योजना (NSS) विभागाच्या वतीने दिमाखदार कार्यक्रम आयोजित करण्यात आला. “संविधानाची शक्ती, युवकांची ताकद” या संकल्पनेतून साजरा झालेल्या या कार्यक्रमात विद्यार्थ्यांनी संविधानाच्या प्रस्तावनेने सामूहिक शपथ घेतली.

कार्यक्रमाच्या अध्यक्षस्थानी महाविद्यालयाचे प्राचार्य डॉ. एस. बी. करंडे होते, तर प्रमुख पाहुणे म्हणून इतिहास विभागप्रमुख प्रा. एस. व्ही. शिंदे उपस्थित होते. कार्यक्रमाला महाविद्यालयाचे IQAC समन्वयक डॉ. बी. डी. लांडे, NSS कार्यक्रम अधिकारी डॉ. एम. ए. ढगे व प्रा. के. एम. माळी, प्रशासकीय अधिकारी भाऊसाहेब पाटील, संगणक विभागप्रमुख बाळासाहेब लिंगे, ज्युनियर कॉलेज समन्वयक पोहळकर, प्रा. व्ही. पी. पाटील, प्रा. रोहित डिसले यांच्यासह मोठ्या संख्येने शिक्षक, शिक्षकेतर कर्मचारी व विद्यार्थी उपस्थित होते.

कार्यक्रमाच्या प्रास्ताविकात डॉ. एम. ए. ढगे यांनी २६ नोव्हेंबर १९४९ रोजी संविधान स्वीकारले गेल्यापासून ते २६ जानेवारी १९५० रोजी अंमलात आल्यापर्यंतच्या प्रवासाची आठवण करून दिली. त्यांनी सांगितले की, “डॉ. बाबासाहेब आंबेडकरांच्या अध्यक्षतेखालील संविधान सभेने २ वर्ष ११ महिने १८ दिवस मेहनत घेऊन जगातील सर्वात मोठे लिखित संविधान देशाला दिले.”

मुख्य व्याख्यानात प्रा. एस. व्ही. शिंदे यांनी अत्यंत ओघवत्या भाषेत संविधानाच्या निर्मितीचा इतिहास उलगडला. त्यांनी सांगितले, “संविधान सभेत ३८९ सदस्य होते, त्यापैकी स्वातंत्र्यानंतर २९९ सदस्य शिल्लक राहिले. केवळ १५ महिला सदस्य असूनही त्यांनी मोलाची भूमिका बजावली. संविधानात २२ भाषांतून हस्तलिखित प्रत तयार झाली, ज्यात शांतिनिकेतनच्या कलाकारांनी सुशोभिकरण केले.” त्यातील मूळ प्रत आजही संसदेच्या लायब्ररीत हवाबंद काचेत जतन केली आहे.”

प्रा. शिंदे यांनी पुढे ठामपणे सांगितले, “संविधान हे केवळ कागदावरील कायदा नाही तर सामाजिक क्रांतीचे दस्तऐवज आहे. जातीभेद, अस्पृश्यता, लिंगभेद नष्ट करून समता, स्वातंत्र्य, बंधुता व न्याय देण्याची हमी यात आहे. पण हे मूल्य टिकवण्यासाठी युवकांनी संविधानविरोधी शक्तींना ओळखून त्यांचा प्रतिकार करायला हवा.”

अध्यक्षीय भाषणात प्राचार्य डॉ. एस. बी. करंडे यांनी विद्यार्थ्यांना खडसावले. ते म्हणाले, “स्वातंत्र्य मिळवणे कठीण होते, पण संविधान व लोकशाहीचे रक्षण करणे त्याहून अवघड आहे. आज सोशल मीडियावर अफवा पसरवून संविधानाला बदनाम करण्याचे प्रयत्न होत आहेत. अशा वेळी तुम्हीच संविधानाचे खरे रक्षक आहात. संविधान वाचले नाही तर तुम्ही फसवले जाल, हे लक्षात ठेवा.”

कार्यक्रमात विद्यार्थ्यांनी संविधान प्रस्तावनेचे सामूहिक वाचन केले. तसेच “मी भारतीय संविधानाचे पालन करीन, त्याच्या मूल्यांचे रक्षण करीन” अशी शपथ घेतली. NSS स्वयंसेवकांनी संविधान दिनानिमित्त रांगोळी, पोस्टर व सूत्रसंभार केला होता.

सूत्रसंचालन प्रा. व्ही. पी. पाटील यांनी तर आभार प्रा. रोहित डिसले यांनी मानले.

या कार्यक्रमामुळे महाविद्यालयातील सुमारे ४५० हून अधिक विद्यार्थ्यांमध्ये संविधानाबद्दलचा आदर व लोकशाही मूल्यांबद्दलची जागरूकता वाढल्याचे शिक्षकवर्गाने समाधान व्यक्त केले.

KDM NEWS प्रतिनिधी