**लातूर कार जळीत हत्याकांड : १ कोटी इन्शुरन्ससाठी थंड डोक्याने रचला स्वतःच्याच मृत्यूचा बनाव; आरोपी गणेश चव्हाण जेरबंद**

**लातूर कार जळीत हत्याकांड : १ कोटी इन्शुरन्ससाठी थंड डोक्याने रचला स्वतःच्याच मृत्यूचा बनाव; आरोपी गणेश चव्हाण जेरबंद** 

**KDM NEWS प्रतिनिधी**दारू-चिकनच्या आमिषाने शेतकऱ्याला फसवले, हात-पाय बांधून कारमध्ये जिवंत जाळले; गर्लफ्रेंडला केलेल्या मेसेजमुळे ५०० किमी दूरून सापडला**

लातूर : कर्जाच्या ओझ्याखाली दबलेल्या एका तरुणाने टर्म इन्शुरन्सचे एक कोटी रुपये लाटण्यासाठी स्वतःच्याच मृत्यूचा थरारक बनाव रचला. यासाठी त्याने एका निष्पाप शेतकऱ्याला दारू आणि चिकनच्या आमिषाने फसवले, कारमध्ये हात-पाय बांधून जिवंत जाळले आणि स्वतः पसार झाला. मात्र, पोलिसांच्या त्वरेने तपासाने अवघ्या २४ तासांत हा डाव उधळला. आरोपी गणेश गोपीनाथ चव्हाण (वय ३५, रा. विठ्ठल नगर, औसा) याला सिंधुदुर्ग जिल्ह्यातील विजयदुर्ग येथून अटक करण्यात आली आहे.

१३ डिसेंबर २०२५च्या रात्री सुमारे ११.३० वाजता औसा तालुक्यातील वानवडा रोडवर एक स्कॉडा कार पूर्णपणे जळून खाक झाली. कारमध्ये एका व्यक्तीचा जळालेला मृतदेह आढळला. कारजवळ सापडलेल्या कड्यावरून आणि कारच्या नंबरवरून हा मृतदेह गणेश चव्हाण यांचाच असल्याचे प्राथमिक तपासात समोर आले. गणेश एका खासगी फायनान्स कंपनीत लातूर डिव्हिजनचे प्रमुख होते. त्यांच्या कुटुंबीयांना ही बातमी कळताच त्यांनी शोक व्यक्त केला.

मात्र, पोलिसांना घटनेत काही गोष्टी संशयास्पद वाटल्या. कार त्यांच्या मेहुण्याच्या नावावर होती, पण गणेश ती नियमित वापरत होते. पोस्टमॉर्टम आणि घटनास्थळावरील पुराव्यांवरून पोलिसांना शंका आली की गणेश जिवंत असू शकतात. तपास गतिमान केला असता धक्कादायक सत्य समोर आले – कारमधील मृतदेह हा गोविंद किसन यादव (वय ५०, रा. पाटील गल्ली, याकतपूर रोड परिसर) यांचा होता. गोविंद हे शेतकरी असून त्या रात्री घरी चालले होते.

गणेशच्या कबुलीजबाबातून प्रकरणाची थरारक टाइमलाइन समोर आली. गणेश मुंबईत फ्लॅट घेण्यासाठी सुमारे ५७ लाखांचे कर्ज काढले होते. व्याज आणि हप्त्यांचा भार सहन न झाल्याने तो मानसिक तणावात होता. दोनदा आत्महत्येचा प्रयत्न केला होता. त्यासाठीच त्याने एक कोटी रुपयांच्या टर्म इन्शुरन्स पॉलिसी काढली होती. कर्ज फेडण्यासाठी तो स्वतःच्या मृत्यूचा बनाव रचण्याच्या तयारीत होता.

१३ डिसेंबरच्या रात्री गणेश लॅपटॉप देण्याच्या बहाण्याने घरातून निघाले. याकतपूर रोडवर दारूच्या नशेत असलेले गोविंद यादव लिफ्ट मागत उभे होते. गणेशने त्यांना लिफ्ट दिली. विश्वास संपादन करण्यासाठी त्यांना एका ढाब्यावर नेले. तिथे चिकन आणि अधिक दारू दिली. गोविंद पूर्णपणे बेशुद्ध झाल्यावर गणेशने त्यांचे हात-पाय बांधले, कारमध्ये टाकले आणि पेट्रोल ओतून आग लावली. कार सुमारे चार तास जळत राहिली.

आग लागल्यानंतर गणेश तिथून पसार झाले. त्यांनी आपल्या गर्लफ्रेंडला एका तिसऱ्या मोबाईलवरून मेसेज केले. हाच मेसेज त्यांच्या अटकेचे कारण ठरला. पोलिसांनी मोबाईल लोकेशन आणि इलेक्ट्रॉनिक सर्व्हेलन्सद्वारे गणेशला ५०० किलोमीटर दूर विजयदुर्ग येथून ताब्यात घेतले. चौकशीत त्यांनी गुन्हा कबूल केला.

लातूरचे पोलिस अधीक्षक अमोल तांबे यांनी सांगितले की, आरोपीने हा डाव अत्यंत थंड डोक्याने रचला होता. मात्र, तांत्रिक तपास आणि सतर्कतेमुळे प्रकरण उघडकीस आले. गोविंद यादव यांच्या मृतदेहाची डीएनए तपासणी करून ओळख निश्चित केली जाईल. गणेशवर खुनाचा गुन्हा दाखल करण्यात आला असून पुढील तपास सुरू आहे. यात आणखी कोणाचा सहभाग आहे का, याचीही चौकशी केली जाणार आहे.

ही घटना एखाद्या हिंदी चित्रपटाला लाजवेल अशी आहे. कर्जाच्या जाळ्यात अडकलेल्या गणेशने एका निरपराध शेतकऱ्याचा बळी घेऊन आपले जीवन वाचवण्याचा प्रयत्न केला, पण कायद्याच्या लांब हातांनी त्याला गजाआड नेले.

KDM NEWS प्रतिनिधी