**बार्शी बसस्थानकातील अनाधिकृत अतिक्रमणामुळे एसटी बस चालकांना त्रास; महामंडळाने नगरपालिकेकडे केली कारवाईची मागणी**

**बार्शी बसस्थानकातील अनाधिकृत अतिक्रमणामुळे एसटी बस चालकांना त्रास; महामंडळाने नगरपालिकेकडे केली कारवाईची मागणी** 

**KDM NEWS प्रतिनिधी बार्शी ** (सोलापूर), १९ डिसेंबर २०२५ :** महाराष्ट्र राज्य मार्ग परिवहन महामंडळाच्या (एसटी) बार्शी आगाराने बसस्थानक परिसरातील अनाधिकृत टपऱ्या, फळगाड्या आणि अल्पोपहार गाड्यांमुळे होणाऱ्या अडथळ्यांबाबत बार्शी नगरपालिकेकडे तक्रार केली आहे. या अतिक्रमणांमुळे बस इन-आउट करताना चालकांना अडचणी येत असून, अपघाताची शक्यता वाढली आहे. महामंडळाने यापूर्वीही अशा तक्रारी केल्या होत्या, पण अद्याप कोणतीही कारवाई झालेली नाही.

बार्शी आगाराचे स्थानक प्रमुख यांनी मुख्याधिकारी, बार्शी नगरपालिका यांना लिहिलेल्या पत्रात म्हटले आहे की, बसस्थानकाच्या इनगेटजवळ दोन अनाधिकृत टपऱ्यांनी अतिक्रमण केले आहे. यामुळे बस आत येताना चालकांना अडचण होते आणि अपघात होण्याची भीती आहे. यापूर्वी या ठिकाणी अपघात झाला असल्याचेही नमूद करण्यात आले आहे. धाराशिव आणि तुळजापूरकडे जाणाऱ्या बस गेटजवळील एका टपरीधारकाने दुकानासमोर मंडप घालून सिमेंटचा कट्टा बांधला आहे, तर शेजारी नव्याने चायनीज गाडा लावण्यात आला आहे. हे गेट सुरू झाल्यास यामुळे मोठा अडथळा निर्माण होईल.

पत्रात पुढे म्हटले आहे की, इनगेट ते आउटगेटपर्यंत अनाधिकृत उपाहारगृहे टाकण्यात आली आहेत. या उपाहारगृहांसमोर नव्याने अल्पोपहार गाड्या लावल्या जात असून, त्यांची संख्या दिवसेंदिवस वाढत आहे. विरुद्ध बाजूला फळगाडे लावले जात असल्याने रस्ता अपुरा पडत आहे आणि लोकांची गर्दी वाढत आहे. परिणामी, बस चालकांना इन-आउट करताना मोठी कसरत करावी लागते. या अतिक्रमणांमुळे भविष्यात अपघात होण्याची शक्यता नाकारता येत नाही आणि हे एसटी महामंडळाच्या हिताचे नाही.

या तक्रारीचा संदर्भ देताना, सोलापूर विभागीय नियंत्रकांच्या २४ सप्टेंबर २०२५ च्या आगार भेटीचा, परिवहन मंत्र्यांच्या २२ नोव्हेंबर २०२५ च्या सोलापूर बसस्थानक भेटीतील सूचना आणि २ डिसेंबर २०२५ च्या पूर्व पत्राचा उल्लेख करण्यात आला आहे. महामंडळाने बार्शी शहर पोलिस निरीक्षक आणि सोलापूर विभागीय नियंत्रकांना या पत्राची प्रत पाठवली आहे.

बार्शी बसस्थानक हे सोलापूर विभागातील महत्त्वाचे केंद्र असून, दररोज शेकडो बस आणि हजारो प्रवासी येथून ये-जा करतात. अतिक्रमणांमुळे प्रवाशांच्या सुरक्षेवरही परिणाम होत आहे. नगरपालिकेने यावर तातडीने कारवाई करावी, अशी मागणी महामंडळाने केली आहे. या प्रकरणी पालिकेकडून अद्याप कोणतीही प्रतिक्रिया मिळालेली नाही, पण सूत्रांनी सांगितले की, लवकरच अतिक्रमण हटाव निर्णय घेण्यात येईल का ?याकडे सर्वांचे लक्ष लागले आहे.

KDM NEWS प्रतिनिधी