**बार्शीत कर्मवीर मामासाहेब जगदाळे यांच्या जयंतीनिमित्त राज्यस्तरीय कबड्डी स्पर्धा; राकेशभाऊ घुले संघ पुणे विजयी**

**बार्शीत कर्मवीर मामासाहेब जगदाळे यांच्या जयंतीनिमित्त राज्यस्तरीय कबड्डी स्पर्धा; राकेशभाऊ घुले संघ पुणे विजयी** 

**KDM NEWS प्रतिनिधी बार्शी, ७ जानेवारी : कर्मवीर मामासाहेब जगदाळे यांच्या १२३ व्या जन्मदिनानिमित्त बी. पी. सुलाखे कॉमर्स कॉलेज, महाराष्ट्र कबड्डी असोसिएशन, सोलापूर कबड्डी असोसिएशन आणि पुण्यश्लोक अहिल्यादेवी होळकर सोलापूर विद्यापीठ यांच्या संयुक्त प्रयत्नाने आयोजित राज्यस्तरीय निमंत्रित कबड्डी स्पर्धा यशस्वीरित्या संपन्न झाली. या स्पर्धेत राज्यातील आठ प्रमुख संघांनी भाग घेतला असून, साखळी पद्धतीने झालेल्या तीव्र सामन्यांमध्ये उत्कृष्ट प्रदर्शन करत राकेशभाऊ घुले कबड्डी संघ, पुणे याने अंतिम फेरी जिंकून पहिला क्रमांक पटकावला. विजेत्यांना ३१ हजार रुपये रोख आणि ट्रॉफी मिळाली.

दुसरा क्रमांक स्वास्तिक क्रीडा मंडळ, मुंबई उपनगर याने मिळवला, ज्यांना २१ हजार रुपये आणि ट्रॉफी प्रदान करण्यात आली. तिसरा क्रमांक छावा क्रीडा मंडळ, कोल्हापूर आणि शिवप्रतिष्ठान क्रीडा मंडळ, धाराशिव यांच्यात विभागला गेला, प्रत्येकाला ११ हजार रुपये आणि ट्रॉफी देण्यात आली.

वैयक्तिक पुरस्कारांमध्ये विशाल ताटे याला सर्वोत्तम रेडर, विक्रम परमार याला सर्वोत्तम डिफेंडर आणि ज्ञानेश्वर जाधव याला सर्वोत्तम ऑलराउंडर म्हणून गौरवण्यात आले.

पारितोषिक वितरण समारंभाला पुण्यश्लोक अहिल्यादेवी होळकर सोलापूर विद्यापीठाचे कुलगुरू डॉ. लक्ष्मीकांत दामा आणि माजी आमदार राजेंद्र विठ्ठल राऊत प्रमुख पाहुणे म्हणून हजर होते. कार्यक्रमाच्या अध्यक्षपदी संस्थेचे कार्यकारिणी सदस्य राजेंद्र पवार होते. यावेळी संस्थाध्यक्ष डॉ. बी. वाय. यादव, उपाध्यक्ष नंदन जगदाळे, सचिव पी. टी. पाटील, सहसचिव अरुण देबडवार, खजिनदार जयकुमार शितोळे, सदस्य दिलीप मोहिते, विद्यापीठ अधिष्ठाता डॉ. शशिकांत तांबे, पोलीस निरीक्षक ढेरे, माजी नगराध्यक्ष रमेश पाटील, नगरसेवक भारत पवार, महाराष्ट्र महिला कबड्डी असोसिएशनच्या प्रतिनिधी अंधारे आणि महाविद्यालय प्राचार्य डॉ. एस. बी. करंडे यांच्यासह अनेक मान्यवर उपस्थित होते.

माजी आमदार राऊत यांनी भाषणात मामासाहेबांच्या खेळप्रेमाचा उल्लेख करत तरुणांना खेळ, आरोग्य आणि शिस्तीला प्राधान्य देण्याचे आवाहन केले. ते म्हणाले, "विजय आणि पराजय हे खेळाचे भाग आहेत; अपयशाने हार न मानता अधिक उत्साहाने प्रयत्न करावेत."

कुलगुरू डॉ. दामा यांनी "शरीरसंपत्ती ही धनसंपत्तीपेक्षा मोठी आहे" असा संदेश दिला. अध्यक्ष पवार यांनी अशा स्पर्धांमुळे ग्रामीण आणि शहरी खेळाडूंना मोठी संधी मिळत असल्याचे सांगितले.

कार्यक्रमाचे सूत्रसंचालन प्रा. प्रेमा दळवी आणि प्रा. रूपाली शिंदे यांनी केले, तर प्रास्ताविक प्रा. रोहित डिसले आणि आभार डॉ. करंडे यांनी मानले. महाविद्यालयातील प्राध्यापक, कर्मचारी आणि विद्यार्थ्यांच्या सहकार्याने ही स्पर्धा यशस्वी झाली, ज्यामुळे बार्शीच्या क्रीडा क्षेत्रात नवे चैतन्य निर्माण झाले आहे.

KDM NEWS प्रतिनिधी