**बार्शी सत्र न्यायालयाचा कठोर निकाल** **झोपलेल्या अल्पवयीन मुलीवर घरात घुसून अत्याचार; आरोपीला २० वर्षे सक्तमजुरी**
**बार्शी सत्र न्यायालयाचा कठोर निकाल**
**झोपलेल्या अल्पवयीन मुलीवर घरात घुसून अत्याचार; आरोपीला २० वर्षे सक्तमजुरी**
**KDM NEWS बार्शी (विशेष प्रतिनिधी):** बार्शी येथील अतिरिक्त जिल्हा व सत्र न्यायालयाने मंगळवारी (५ मे) अल्पवयीन मुलीवर पाशवी लैंगिक अत्याचार केल्याच्या प्रकरणात एका २९ वर्षीय आरोपीला २० वर्षे सक्तमजुरी व दंडाची शिक्षा सुनावली. न्यायाधीश व्ही. के. मांडे यांनी दिलेल्या या निकालामुळे केवळ चार महिन्यांत न्याय मिळाल्याने परिसरात समाधान व्यक्त केले जात आहे.
१ जानेवारी २०२४ रोजी रात्री ११ वाजण्याच्या सुमारास माळशिरस तालुक्यातील सिद्धार्थ नगर येथे ही घटना घडली. लखन ऊर्फ बापू जोतीबा सावंत (वय २९, रा. सिद्धार्थ नगर, माळशिरस) याने एका घरात चोरट्या मार्गाने प्रवेश केला आणि झोपलेल्या अल्पवयीन मुलीवर अत्याचार केला. मुलीच्या ओरडण्याने जाग आल्यावर ग्रामस्थांनी तातडीने धाव घेत आरोपीला घटनास्थळाजवळच पकडले आणि पोलिसांच्या स्वाधीन केले.
कुर्डूवाडी पोलीस ठाण्यात पीडितेच्या आईने दिलेल्या तक्रारीवरून भारतीय दंड संहिता कलम ३७६ व POCSO कायद्यांतर्गत गुन्हा दाखल करण्यात आला होता. तत्कालीन पोलीस निरीक्षक गोपाळ पवार यांच्या मार्गदर्शनाखालील पथकाने वेगाने तपास पूर्ण करून न्यायालयात भक्कम दोषारोपपत्र दाखल केले.
**न्यायालयात ८ साक्षीदार तपासले**
सरकार पक्षाने खटला सिद्ध करण्यासाठी ८ साक्षीदार तपासले. पीडित मुलीची साक्ष, तिने आईला दिलेली प्राथमिक माहिती, प्रत्यक्षदर्शी ग्रामस्थांची साक्ष आणि वैद्यकीय अहवाल हे पुरावे निर्णायक ठरले. सरकारी वकील ॲड. दिनेश देशमुख यांनी आरोपीच्या कृत्याला अमानुष ठरवत कठोर शिक्षेची मागणी केली.
न्यायाधीश व्ही. के. मांडे यांनी आरोपी लखन सावंत याला दोषी ठरवत खालील शिक्षा सुनावली:
- **IPC कलम ३७६ (२) व POCSO कलम ४** — २० वर्षे सक्तमजुरी व ५,००० रुपये दंड (दंड न भरल्यास अतिरिक्त ३ महिने कारावास).
- **POCSO कलम ८ व १२** — प्रत्येकी ३ वर्षे सक्तमजुरी व दंड.
सर्व शिक्षा एकत्रित भोगाव्या, असा स्पष्ट आदेश न्यायालयाने दिला.
या प्रकरणातील यशस्वी तपास व न्यायालयीन पैरवीसाठी सहायक पोलीस अधीक्षक अंजना कृष्णा व्ही. एस., पोलीस निरीक्षक अतुल मोहिते, तपास अधिकारी गोपाळ पवार आणि पैरवी अधिकारी हेडकॉन्स्टेबल योगेश मंडलिक यांचे कौतुक करण्यात आले.
KDM NEWS प्रतिनिधी
टिप्पण्या