**देहूगावात अधिक पुरुषोत्तम मास निमित्त अखंड हरिनाम सप्ताह व तुकाराम महाराज गाथा पारायणाचे भव्य आयोजन**

**देहूगावात अधिक पुरुषोत्तम मास निमित्त अखंड हरिनाम सप्ताह व तुकाराम महाराज गाथा पारायणाचे भव्य आयोजन** 

**KDM NEWS प्रतिनिधी बार्शी/पुणे:** श्रीसंत माणकोजी महाराज बोधले व सद् गुरु प्रभाकर दादा बोधले महाराज यांच्या प्रेरणेने आणि डॉ. जयवंत महाराज बोधले यांच्या मार्गदर्शनाखाली यावर्षीच्या ज्येष्ठ अधिक पुरुषोत्तम मासानिमित्त जगद्गुरु श्रीसंत तुकाराम महाराज यांच्या गाथा पारायणासह अखंड हरिनाम सप्ताहाचे भव्य आयोजन श्रीक्षेत्र देहूगाव (ता. हवेली, जि. पुणे) येथे करण्यात आले आहे. इंद्रायणी नदीच्या तीरावरील संत तुकाराम महाराजांच्या अवतार आणि वैकुंठगमन स्थळी हा १६वा अधिक मास सप्ताह संपन्न होणार आहे.

अधिक मास हा दर तीन वर्षांनी येतो. या काळात विविध धार्मिक विधी, कीर्तन, हरिनाम आणि पारायण यांचे महत्त्व वाढते. बोधले महाराजांच्या सांप्रदायिक परंपरेनुसार प्रत्येक अधिक मासात वेगवेगळ्या तीर्थक्षेत्रांवर अखंड हरिनाम सप्ताहाचे आयोजन केले जाते. आतापर्यंत हम्पी, कुडल-संगम, गणगापूर, पंढरपूर, तुळजापूर, त्र्यंबकेश्वर, काशी, पैठण, आळंदी आदी १५ पवित्र स्थळांवर हे सप्ताह यशस्वी झाले आहेत. यंदा १६व्या सप्ताहाचे ठिकाण देहूगाव निश्चित झाले आहे.

**कार्यक्रमाची रूपरेषा**

सप्ताहाचा प्रारंभ **रविवार, १७ मे २०२६** रोजी होणार असून, समापन **रविवार, २४ मे २०२६** रोजी होईल. दररोजचा कार्यक्रम खालीलप्रमाणे असेल:

- **पहाटे ४ ते ६** — काकड आरती

- **सकाळी ७ ते १** — श्रीसंत तुकाराम महाराज गाथा पारायण

- **सायंकाळी ४ ते ५** — हरिपाठ

- **सायंकाळी ५ ते ६** — प्रवचन

- **सायंकाळी ६.३० ते ८.३०** — हरिकीर्तन

- **रात्री** — हरिजागर

**प्रमुख कीर्तनकार**

सप्ताहात प्रासादिक परंपरेच्या नामवंत कीर्तनकारांचा सहभाग असेल. प्रथम दिवशी **ह.भ.प. विठ्ठल दादा वासकर महाराज** (फड परंपरा, पंढरपूर) यांचे कीर्तन होईल. त्यानंतर **ह.भ.प. चैतन्य महाराज देगलुरकर** (देगलुरकर महाराज संस्थान, पंढरपूर), **ह.भ.प. प्रमोद महाराज जगताप** (वाणीभूषण, बारामती), **ह.भ.प. उमेश महाराज दशरथे** (जोग महाराज शिक्षण संस्था, आळंदी), **ह.भ.प. पांडूरंग महाराज घुले** (गाथा मंदिर अध्यक्ष, देहूगाव), **ह.भ.प. रामकृष्ण महाराज लहवितकर** (महामंडलेश्वर, नाशिक) यांचा कार्यक्रम असेल.

**२३ मे २०२६** रोजी विशेष कार्यक्रमात केशवभट्ट स्वामी वंशज **ह.भ.प. अमृत महाराज जोशी** यांचे प्रवचन आणि श्रीसंत तुकाराम महाराजांच्या विद्यमान वंशज **ह.भ.प. पुंडलिक महाराज देहूकर** (देहूगाव) यांचे कीर्तन होईल. 

समापन समारंभात **ह.भ.प. श्री. डॉ. जयवंत महाराज बोधले** (धामणगांव, पंढरपूर) यांचे काल्याचे कीर्तन सकाळी १० ते १२ दरम्यान होणार आहे.

**व्यापक सहभाग**

या सप्ताहात बोधले महाराज फडावरील सर्व गांवे, परंपरेतील गायक, वादक, टाळकरी आणि शिष्यवृंद मोठ्या संख्येने उपस्थित राहणार आहेत. महाराष्ट्रासह आंध्रप्रदेश, कर्नाटक, तेलंगणा आदी राज्यांतील भाविक भक्त मोठ्या उत्साहाने सहभागी होणार आहेत. सत्संग आणि सद्गुरु सेवेचा हा अनमोल योग सर्वांना लाभेल, अशी अपेक्षा व्यक्त करण्यात येत आहे.

**सद्गुरु प्रभाकर दादा बोधले महाराज सेवा प्रतिष्ठान, पंढरपूर** यांच्याकडून सर्व भाविक भक्तांना अखंड हरिनाम सप्ताहातील कीर्तनसेवा श्रवण करून पारमार्थिक लाभ घेण्याचे आवाहन करण्यात आले आहे.

हा सप्ताह केवळ धार्मिक कार्यक्रम नसून, संत परंपरेच्या जपणुकीचा आणि भक्ती मार्गाच्या प्रसाराचा महत्त्वाचा उपक्रम आहे.