**सोलापूर : जिल्हा रुग्णालयात जागतिक तंबाखू विरोधी दिन उत्साहात साजरा**

**सोलापूर : जिल्हा रुग्णालयात जागतिक तंबाखू विरोधी दिन उत्साहात साजरा** 

**सोलापूर, दि. ३० :** जिल्हा रुग्णालयात जागतिक तंबाखू विरोधी दिन (२९ मे) उत्साहात साजरा करण्यात आला. राष्ट्रीय तंबाखू नियंत्रण कार्यक्रमांतर्गत जिल्हा तंबाखू नियंत्रण कक्षाच्या वतीने विविध उपक्रम राबवण्यात आले.

कार्यक्रमाला जिल्हा शल्यचिकित्सक डॉ. वर्षा डोईफोडे, जिल्हा आरोग्य अधिकारी डॉ. सुरेश कोपुरवाड आणि निवासी वैद्यकीय अधिकारी डॉ. श्रीकांत कुलकर्णी यांच्या मार्गदर्शनाखाली सुरुवात झाली. यावेळी अतिरिक्त जिल्हा शल्यचिकित्सक डॉ. चंद्रकांत क्षिरसागर, जिल्हा मौखिक आरोग्य अधिकारी डॉ. रोहन वायचळ, दंत शल्यचिकित्सक डॉ. सुवर्णा राठोड, मेट्रन विजयमाला बेले आणि मराठवाडा ग्रामीण विकास संस्थेचे समन्वयक अनिल गुंजे उपस्थित होते.

**मुख्य आकर्षण :**  

यंदाचा विषय “Unmasking the appeal: Countering nicotine & tobacco addiction” (आकर्षणाचा मुखवटा उतरवूया – निकोटीन आणि तंबाखूच्या व्यसनाला प्रतिकार करूया) होता.

**उपक्रम :**  

- जिल्हाधिकारी कार्यालय व उप प्रादेशिक परिवहन कार्यालयातील अधिकारी-कर्मचाऱ्यांची मौखिक आरोग्य तपासणी व समुपदेशन.  

- स्वाक्षरी मोहीम व पोस्टर स्पर्धा.  

- बासरी व तबला वादनाद्वारे म्युझिक थेरपीचे प्रात्यक्षिक (सुमीत घाडगे व रत्नदीप वारगड).  

- तंबाखू मुक्ती केंद्राच्या माध्यमातून व्यसन सोडलेल्या रुग्णांचे अनुभव कथन.  

अतिरिक्त जिल्हा शल्यचिकित्सक डॉ. चंद्रकांत क्षिरसागर यांनी तंबाखूच्या व्यसनामुळे होणाऱ्या असंसर्गजन्य आजारांबाबत माहिती दिली आणि जिल्हा रुग्णालयातील तंबाखू मुक्ती केंद्राचा लाभ घेण्याचे आवाहन केले.  

श्री. अमित महाडिक व श्रीमती मंजूश्री मुळे यांनी उपस्थितांना तंबाखू मुक्तीची शपथ दिली.  

कार्यक्रमाचे प्रास्ताविक डॉ. एस. बी. दळवी यांनी केले तर आभार प्रदर्शन डॉ. रोहन वायचळ यांनी केले.  

हा कार्यक्रम आरोग्य जाणिव वाढवण्यासोबतच व्यसनमुक्तीसाठी प्रेरणादायी ठरला.

KDM NEWS प्रतिनिधी