**माढ्यात एसीबीचा धडक कारवाई: मोफत भांडी संचासाठी लाच घेणारे दोन खाजगी ऑपरेटर रंगेहात जाळ्यात**

**माढ्यात खळबळ: कामगारांच्या भांडी संचासाठी मागितली लाच; एसीबीच्या जाळ्यात अडकले दोन खासगी ऑपरेटर**

**KDM NEWS प्रतिनिधी माढा : ** महाराष्ट्र इमारत व इतर बांधकाम कामगार कल्याणकारी मंडळाच्या मोफत गृहोपयोगी भांडी संच योजनेचा गैरफायदा घेत कामगारांकडून लाच उकळणाऱ्या दोन खाजगी ऑपरेटरना लाचलुचपत प्रतिबंधक विभाग (एसीबी) सोलापूर युनिटने बुधवारी (६ मे २०२६) रंगेहात पकडले. उपळाई (बुद्रुक) येथील भांडी वाटप केंद्रावर ही कारवाई करण्यात आली असून, माढा तालुक्यात खळबळ उडाली आहे. 

अटक करण्यात आलेले आरोपी **विनोद विजय गाडेकर** (वय ३७, रा. उपळाई बु., भांडी वाटप केंद्र ऑपरेटर) आणि **दिनेश मनोहर वाघमारे** (वय २३, रा. माळी वस्ती, उपळाई बु., ऑपरेटर) असे आहेत. 

           नेमके प्रकरण

तक्रारदार हे नोंदणीकृत बांधकाम कामगार आहेत. त्यांनी २७ मार्च २०२६ रोजी शासनाच्या मोफत भांडी संच योजनेसाठी अर्ज केला होता. ही योजना पूर्णपणे मोफत असतानाही मुख्य आरोपी विनोद गाडेकर याने संच मिळवून देण्यासाठी प्रथम १,२०० रुपयांची मागणी केली. चर्चेनंतर ५०० रुपयांवर तडजोड झाली. हक्काच्या योजनेसाठी पैसे मागितल्याने तक्रारदाराने १६ एप्रिल २०२६ रोजी सोलापूर एसीबीकडे लेखी तक्रार दाखल केली. 

एसीबीने तक्रारीची गांभीर्याने दखल घेत पडताळणी केली आणि बुधवारी सापळा रचला. माढा येथील महाराणी लक्ष्मीबाई विद्यालयातील कार्यालयात हा सापळा यशस्वी झाला. गाडेकरने तक्रारदाराला लाच रक्कम दुसऱ्या आरोपी दिनेश वाघमारे याच्याकडे देण्याचे सांगितले. वाघमारेने ५०० रुपये स्वीकारताच एसीबी पथकाने दोघांना जागीच ताब्यात घेतले. या वेळी दोन शासकीय पंच उपस्थित होते. 

           कारवाईचे नेतृत्व

ही कारवाई सोलापूर एसीबीचे पोलीस उपअधीक्षक **प्रशांत चौगुले** आणि पोलीक्षक **शैलेश पवार** यांच्या मार्गदर्शनाखाली करण्यात आली. या प्रकरणी माढा पोलीस ठाण्यात भ्रष्टाचार प्रतिबंधक कायद्याच्या कलम ७(अ) आणि १२ अंतर्गत गुन्हा दाखल करण्यात आला आहे. पुढील तपास सुरू आहे. 

महाराष्ट्र इमारत व इतर बांधकाम कामगार कल्याणकारी मंडळाकडून नोंदणीकृत कामगारांना मोफत भांडी संच (स्टेनलेस स्टीलचे विविध स्वयंपाक भांडी) उपलब्ध करून दिले जातात. ही योजना कामगारांच्या घरगुती गरजा पूर्ण करण्यासाठी सुरू करण्यात आली आहे. मात्र, काही खाजगी ऑपरेटर या योजनेचा गैरव्यवहार करत असल्याचे समोर आले आहे. 

KDM NEWS प्रतिनिधी