**बार्शी येथे देवदर्शनाच्या कार्यक्रमात नातेवाईकांकडून मारहाण; पाच जणांवर गुन्हा दाखल**

**बार्शी येथे देवदर्शनाच्या कार्यक्रमात नातेवाईकांकडून मारहाण; पाच जणांवर गुन्हा दाखल** 

**KDM NEWS प्रतिनिधी बार्शी (सोलापूर):** बार्शी तालुक्यातील बारबोले वस्ती, कासारवाडी रोड येथे देवदर्शनाच्या कार्यक्रमादरम्यान नातेवाईकांनी दारू पिऊन हल्ला केल्याची घटना ५ मे २०२६ रोजी रात्री ११ वाजता घडली. या हल्ल्यात कुटुंबातील चार जण जखमी झाले असून, पाच जणांविरुद्ध बार्शी पोलिस ठाण्यात गुन्हा दाखल करण्यात आला आहे.

फिर्यादी किसन वसंत काळे (वय २४, रा. लल्लुभाई कंपाउंड, मानखुर्द, मुंबई; सध्या बारबोले वस्ती, बार्शी) यांनी दिलेल्या फिर्यादीनुसार, ते आपल्या कुटुंबासह देवदर्शनासाठी बार्शी येथे आले होते. २६ मे रोजी संध्याकाळी नातेवाईक आदेश धर्म पवार, सचिन आप्पा काळे, रावशा नाना काळे, राहुल सतिश काळे आणि परशुराम सागर पवार (सर्व रा. पारधी कॅम्प, बार्शी) दारू पिऊन आले होते. त्यावेळी फिर्यादी कुटुंबाने त्यांना कार्यक्रमात दारू न पिण्याची विनंती केली होती. त्यावर त्यांनी "हे आमचे गाव आहे, आमची दादागिरी चालते" असे म्हणत धमकावले होते.

५ मे रोजी रात्री ११ वाजता देवदर्शन झाल्यानंतर कुटुंब झोपायला गेले असताना उक्त पाचही जण पुन्हा दारू पिऊन आले. "तुम्ही आम्हाला सांगणार कोण?" असे म्हणत आदेश पवार व सचिन काळे यांनी किसन काळे यांच्या डोक्यात व हातावर काठी व दगडाने मारहाण केली. डोक्यातून रक्त वाहू लागले. किसन यांना वाचवण्यासाठी आलेल्या आत्या उषा चव्हाण, बहीण कविता चव्हाण, भाऊ पोपट वसंत काळे आणि भावजय लक्ष्मी पोपट काळे यांनाही काठी, दगड आणि लाथाबुक्क्यांनी मारहाण करण्यात आली. हल्लेखोरांनी "तुम्हाला जिवंत सोडणार नाही, विकेट पाडतो" अशी धमकी देत घटनास्थळावरून पळ काढला.

जखमींना प्रथम बार्शी ग्रामीण रुग्णालयात उपचारासाठी नेण्यात आले. त्यानंतर त्यांनी बार्शी पोलिस ठाण्यात तक्रार दाखल केली. पोलिसांनी एनसीआरबी अंतर्गत एकीकृत अन्वेषण फॉर्म-१ नुसार प्रकरण नोंदवले आहे.

या प्रकरणी आदेश धर्म पवार, सचिन आप्पा काळे, रावशा नाना काळे, राहुल सतिश काळे आणि परशुराम सागर पवार या पाचही आरोपींविरुद्ध मारहाण, धमकी आणि सार्वजनिक शांतता भंगाच्या कलमांनुसार गुन्हा दाखल करण्यात आला आहे. पोलिस अधिक तपास करत आहेत.

KDM NEWS प्रतिनिधी