**बार्शीत ‘कडक’ वातावरण; IPS अंजना कृष्णा यांच्या अतिरिक्त कार्यभाराने अवैध धंदेवाल्यांमध्ये खळबळ**
**बार्शीत ‘कडक’ वातावरण; IPS अंजना कृष्णा यांच्या अतिरिक्त कार्यभाराने अवैध धंदेवाल्यांमध्ये खळबळ**
**KDM NEWS प्रतिनिधी बार्शी (सोलापूर) :** बार्शी उपविभागीय पोलीस अधिकारी पदाचा अतिरिक्त कार्यभार IPS अंजना कृष्णा यांच्याकडे आल्यानंतर शहर व तालुक्यात अवैध व्यवसायिकांमध्ये प्रचंड खळबळ उडाली आहे. गुटखा, मटका, अवैध दारू, जुगार क्लब, गांजा विक्री आणि लॉजमधील वेश्या व्यवसाय यांसारख्या ‘दोन नंबर’ धंद्यांवर कठोर कारवाईचा धाक बसल्याने धंदेवाल्यांची झोप उडाली आहे. सध्या शहरात “वातावरण कडक आहे” अशी चर्चा सर्वत्र रंगताना दिसत आहे.
बार्शीचे उपविभागीय पोलीस अधिकारी अशोक सायकर यांच्या सेवानिवृत्तीनंतर रिक्त झालेल्या पदाचा अतिरिक्त भार करमाळा येथील उपविभागीय पोलीस अधिकारी तथा सहाय्यक पोलीस अधीक्षक IPS अंजना कृष्णा यांच्याकडे सोपविण्यात आला. त्यांच्या धडाकेबाज, निडर आणि कठोर कार्यशैलीमुळे अवैध धंदे चालवणाऱ्यांनी मोठा धसका घेतला आहे. अनेक व्यावसायिकांनी आपले धंदे छुप्या पद्धतीने चालवण्यास सुरुवात केली असून, काहींनी तात्पुरते व्यवहार बंद ठेवल्याची माहिती समोर येत आहे.
अवैध धंद्यांवर बसला लगाम
शहरातील बालाजी कॉलनीतील एक प्रमुख गुटखा माफियाने कारवाई टाळण्यासाठी स्वतंत्र ‘खबरदारी पथके’ तयार केल्याचे समजते. विक्रेत्यांना “चोरून विका, जास्त साठा ठेवू नका, मुख्य ठिकाणांपासून दूर स्टॉक ठेवा” अशा सूचना दिल्या जात असल्याची शहरात चर्चा आहे.
अवैध दारू विक्रेत्यांना वाईन शॉप्सकडून लपून-छपून विक्री करण्यास सांगितले जात आहे. बायपास भागातील पत्त्यांचे जुगार क्लब आणि लॉजवरील वेश्या व्यवसाय तात्पुरते बंद ठेवण्यात आले आहेत. दिवसाला १५ ते २० लाख रुपयांची उलाढाल असलेले हे धंदे सध्या मोठ्या प्रमाणात प्रभावित झाले आहेत.
अंजना कृष्णा : धाडसी आणि चर्चित अधिकारी
IPS अंजना कृष्णा (२०२२ बॅच) केरळातील तिरुवनंतपुरम येथील आहेत. सोलापूर जिल्ह्यातील कुर्डू येथे अवैध मुरूम उत्खननाविरोधात कारवाई करताना उपमुख्यमंत्री अजित पवार यांच्याशी झालेला संवाद सोशल मीडियावर व्हायरल झाला होता. त्यात त्यांनी कायद्याच्या बाजूने ठाम भूमिका घेतल्याने राज्यभर त्यांच्या दबंग कार्यशैलीची चर्चा झाली. अवैध उत्खनन, भ्रष्टाचार आणि गुन्हेगारीविरोधात त्या नेहमी आक्रमक राहिल्या आहेत.
बार्शीतील नागरिकांच्या मते, अशा धडाकेबाज अधिकाऱ्यांची शहराला कायमस्वरूपी गरज आहे.
बार्शीतील गुन्हेगारीचे वास्तव
बार्शी उपविभागात गुन्हेगारीचे प्रमाण मध्यम ते उच्च पातळीवर आहे. अवैध धंद्यांशी संबंधित गुन्हे (गुटखा, दारू, जुगार, गांजा) येथे वारंवार नोंदवले जातात. याशिवाय खून, अपहरण, खंडणी, महिला अत्याचार, दागिने चोरी, फसवणूक आणि जमीन-जागा वादाशी संबंधित घटनाही घडतात. महाराष्ट्रातील एकूण गुन्हेगारी ट्रेंडप्रमाणे (NCRB) महिला आणि बालकांविरोधातील गुन्ह्यांत वाढ दिसते.
अवैध धंद्यांमुळे गुन्हेगारी वाढत असल्याची तक्रार नागरिकांकडून वारंवार येत होती. IPS अंजना कृष्णा यांच्या अतिरिक्त कार्यभारामुळे या धंद्यांवर आळा बसल्याने कायदा-सुव्यवस्थेची परिस्थिती सुधारण्याची आशा निर्माण झाली आहे.
नागरिकांचे स्वागत
बार्शी शहर आणि तालुक्यातील सर्वसामान्य नागरिक या कारवाईचे स्वागत करत आहेत. “अवैध धंद्यांमुळे समाजात गुन्हेगारी वाढते. कायद्याचा धाक निर्माण करणाऱ्या अधिकाऱ्यांची गरज आहे,” अशी भावना अनेकांनी व्यक्त केली.
एकंदरीत, IPS अंजना कृष्णा यांच्या नेतृत्वाखालील कठोर कारवाईमुळे बार्शीतील कायदा-सुव्यवस्थेचे चित्र बदलण्याची शक्यता वर्तवली जात आहे. अवैध धंदेवाल्यांमध्ये भीतीचे वातावरण असले तरी, सामान्य नागरिकांमध्ये आशा आणि समाधानाचे वातावरण निर्माण झाले आहे.
KDM NEWS प्रतिनिधी
टिप्पण्या