**सोलापूर जिल्ह्यात विषारी मद्याविरुद्ध धडक मोहीम; ७२ गुन्हे दाखल, २४.७२ लाखांचा मुद्देमाल जप्त**

**सोलापूर जिल्ह्यात विषारी मद्याविरुद्ध धडक मोहीम; ७२ गुन्हे दाखल, २४.७२ लाखांचा मुद्देमाल जप्त** 

**KDM NEWS प्रतिनिधी सोलापूर:** पुणे येथील मिथेनॉल मिश्रित विषारी मद्यप्राशनाच्या घटनेनंतर सोलापूर जिल्हा प्रशासनाने अवैध मद्यनिर्मिती, विक्री आणि मिथेनॉलच्या गैरवापराविरुद्ध विशेष मोहीम सुरू केली आहे. या मोहिमेत आतापर्यंत ७२ गुन्हे दाखल करण्यात आले असून ५८ जणांवर कारवाई करण्यात आली आहे. 

राज्य उत्पादन शुल्क विभाग, पोलीस, महसूल आणि स्थानिक स्वराज्य संस्थांच्या संयुक्त पथकांनी केलेल्या कारवाईत तीन वाहनांसह सुमारे २४ लाख ७२ हजार रुपयांचा मुद्देमाल जप्त करण्यात आला आहे. यामध्ये अवैध मद्य, मिथेनॉल, उत्पादन साहित्य आणि वाहतुकीसाठी वापरलेली वाहने यांचा समावेश आहे.

जिल्हाधिकारी एस. कार्तीकेयन यांनी या प्रकरणी ‘शून्य सहनशीलता’ धोरणाची घोषणा केली आहे. त्यांनी स्पष्ट केले की, अवैध मद्यनिर्मिती आणि विषारी रसायनांचा गैरवापर करणाऱ्यांवर कठोर कारवाई केली जाईल. नागरिकांना देखील सतर्क राहण्याचे आणि संशयास्पद मद्य विक्रीबाबत तात्काळ माहिती देण्याचे आवाहन करण्यात आले आहे.

पुणे-पिंपरी-चिंचवड परिसरात झालेल्या विषारी मद्यकांडानंतर महाराष्ट्रात अवैध हातभट्ट्या आणि मिथेनॉल पुरवठ्यावर विशेष नजर ठेवण्यात येत आहे. सोलापूर जिल्ह्यातील ही संयुक्त कारवाई याच पार्श्वभूमीवर सुरू करण्यात आली आहे. प्रशासनाने जिल्हाभरात नियमित छापे टाकण्याचे आदेश दिले असून, ग्रामीण भागातही गस्त वाढवण्यात आली आहे.

या मोहिमेमुळे जिल्ह्यातील अवैध धंदे थंडावण्यास मदत होईल, अशी अपेक्षा व्यक्त केली जात आहे. अधिक तपास सुरू असून, गुन्हेगारांच्या नेटवर्कचा शोध घेतला जात आहे. नागरिकांनी सुरक्षित आणि अधिकृत मद्यच घेण्याचे आवाहन जिल्हाधिकाऱ्यांनी केले आहे.

KDM NEWS प्रतिनिधी