**दौंडमध्ये ‘एफडीए’ची मोठी कारवाई; तीन गुऱ्हाळांवर छापे, १५ हजार किलो भेसळयुक्त गूळ जप्त!**

**दौंडमध्ये ‘एफडीए’ची मोठी कारवाई; तीन गुऱ्हाळांवर छापे, १५ हजार किलो भेसळयुक्त गूळ जप्त!** 

**KDM NEWS दौंड (प्रतिनिधी):**

पुणे जिल्ह्यातील दौंड तालुक्यात भेसळयुक्त गूळ बनवणाऱ्या कारखान्यांवर अन्न व औषध प्रशासनाने (FDA) मोठी कारवाई केली आहे. दौंड तालुक्यातील तीन गूळ निर्मिती कारखान्यांवर (गुऱ्हाळांवर) एफडीएच्या अधिकाऱ्यांनी एकाच वेळी छापे टाकले. या कारवाईत गुळामध्ये मोठ्या प्रमाणावर साखरेची भेसळ केली जात असल्याचे धक्कादायक वास्तव समोर आले आहे.

या धडक कारवाई दरम्यान अधिकाऱ्यांनी तिन्ही ठिकाणांवरून तब्बल **१५ हजार किलो (१५ टन)** भेसळयुक्त गुळाचा साठा जप्त केला आहे. जप्त करण्यात आलेल्या या साठ्याची किंमत सुमारे **१० लाख ६६ हजार रुपये** असल्याचे प्रशासनाकडून सांगण्यात आले.

 **अशी झाली कारवाई**

दौंड तालुक्यातील काही गुऱ्हाळांमध्ये गुळाचा दर्जा सुधारण्यासाठी आणि वजन वाढवण्यासाठी साखरेचा बेकायदेशीर वापर केला जात असल्याची गोपनीय माहिती एफडीएच्या पथकाला मिळाली होती. या माहितीच्या आधारे अधिकाऱ्यांच्या पथकाने अचानक धाडी टाकल्या. तेथे गुळ तयार करताना त्यात साखर मिसळली जात असल्याचे रंगेहात पकडण्यात आले.

         **नमुने प्रयोगशाळेत पाठवले**

 "ग्राहकांच्या आरोग्याशी खेळणाऱ्या अशा भेसळखोरांवर कडक कारवाई केली जाईल," असा इशारा एफडीएच्या वरिष्ठ अधिकाऱ्यांनी दिला आहे.

 

कारवाई दरम्यान जप्त करण्यात आलेल्या गुळाचे आणि साखरेचे नमुने पुढील तपासणीसाठी शासकीय प्रयोगशाळेत पाठवण्यात आले आहेत. प्रयोगशाळेचा अहवाल आल्यानंतर संबंधित कारखाना मालकांवर अन्न सुरक्षा आणि मानके कायद्यांतर्गत (FSSAI) कडक कायदेशीर गुन्हा दाखल करण्यात येणार आहे.

बाजारपेठेत शुद्ध गुळाच्या नावाखाली ग्राहकांची होणारी फसवणूक रोखण्यासाठी एफडीएने ही मोहीम तीव्र केली असून, या कारवाईमुळे पुणे जिल्ह्यातील बेकायदेशीर गुऱ्हाळ चालकांचे धाबे दणाणले आहेत.

KDM NEWS प्रतिनिधी