**ॲट्रॉसिटी खून प्रकरणात वारसदारांचा शोध; १५ दिवसांत कागदपत्रे सादर करा**

**ॲट्रॉसिटी खून प्रकरणात वारसदारांचा शोध; १५ दिवसांत कागदपत्रे सादर करा**

**KDM NEWS प्रतिनिधी सोलापूर, ११ जून** — सामाजिक न्याय व विशेष सहाय्य विभागाच्या २० नोव्हेंबर २०२५ च्या शासन निर्णयानुसार, अनुसूचित जाती व जमाती (अत्याचार प्रतिबंधक) अधिनियमांतर्गत खून किंवा मृत्यू झालेल्या पीडितांच्या पात्र वारसांना शासकीय नोकरी देण्याची प्रक्रिया सुरू करण्यात आली आहे. सोलापूर जिल्ह्यातील प्रलंबित प्रकरणांमध्ये याबाबत कार्यवाही सुरू असताना, एका महत्त्वाच्या प्रकरणातील वारसदार शोधण्यासाठी प्रशासनाने जाहीर आवाहन केले आहे.

अक्कलकोट एमआयडीसी पोलीस स्टेशनमध्ये नोंदवलेल्या गुन्हा रजिस्टर क्रमांक ९२६/२०२० अंतर्गत दिवंगत **दत्ता लक्ष्मण खंदारे** यांच्या हत्येचा गुन्हा ॲट्रॉसिटी अधिनियमाखाली दाखल करण्यात आला होता. या प्रकरणातील पात्र वारसदारांचा शोध घेण्यात येत असून, चौकशीत अद्याप त्यांची माहिती उपलब्ध झालेली नाही.

सहाय्यक आयुक्त, समाज कल्याण, सुलोचना सोनवणे यांनी कळवल्याप्रमाणे, दिवंगत दत्ता लक्ष्मण खंदारे यांची पत्नी, मुले, इतर कायदेशीर वारस किंवा त्यांचे प्रतिनिधी यांनी या जाहीर प्रसिद्धीपासून **१५ दिवसांच्या आत** खालील कागदपत्रांसह सहाय्यक आयुक्त, समाज कल्याण कार्यालय, डॉ. बाबासाहेब आंबेडकर सामाजिक न्याय भवन, तिसरा मजला, सात रस्ता, सोलापूर येथे संपर्क साधावा:

- वारस प्रमाणपत्र

- आधार कार्ड

- जन्मदाखला

- रेशन कार्ड

- इतर संबंधित पुरावे

निर्धारित मुदतीत कोणतीही दावा, हरकत किंवा माहिती प्राप्त न झाल्यास उपलब्ध अभिलेखांवरून पुढील कार्यवाही करण्यात येईल. नंतर कोणतेही दावे स्वीकारले जाणार नाहीत, असे प्रशासनाने स्पष्ट केले आहे.

या मोहिमेद्वारे पात्र वारसांना शासकीय नोकरीचा लाभ वेळेत मिळावा, यासाठी जिल्हा प्रशासन प्रयत्नशील आहे. अधिक माहितीसाठी समाज कल्याण कार्यालयाशी संपर्क साधावा.