**सोलापूर : राज्यस्तरीय अधिकाऱ्यांनी खासगी सोनोग्राफी केंद्रांची अचानक पाहणी**

**सोलापूर : राज्यस्तरीय अधिकाऱ्यांनी खासगी सोनोग्राफी केंद्रांची अचानक पाहणी** 

**KDM NEWS प्रतिनिधी सोलापूर**, दि. १३ जून : पीसीपीएनडीटी कायद्याची कठोर अंमलबजावणी करण्यासाठी राज्यस्तरीय अधिकाऱ्यांनी सोलापूर जिल्ह्यातील नोंदणीकृत खाजगी सोनोग्राफी केंद्रांना अचानक भेटी दिल्या. यामध्ये रुग्णनोंदी, ऑनलाइन एफ-फॉर्म, कायद्याचे पालन, आवश्यक कागदपत्रे आणि केंद्रातील इतर सुविधांची सविस्तर तपासणी करण्यात आली.

आरोग्य भवन, मुंबई येथे २७ मे २०२६ रोजी राज्य पर्यवेक्षीय मंडळाची बैठक झाली. या बैठकीत माननीय आरोग्य मंत्र्यांच्या सूचनेनुसार ही तपासणी मोहीम राबवण्यात आली. लिंग निवड प्रतिबंधित करणे आणि गर्भलिंग निदान रोखणे हा या भेटींचा मुख्य उद्देश होता.

**डॉ. दिगंबर कानगुले**, उपसंचालक (वि. ल. टो.), राज्य कुटुंब कल्याण कार्यालय, पुणे यांनी सांगितले की, “पीसीपीएनडीटी कायद्याची प्रभावी अंमलबजावणी करण्यासाठी अशा अचानक भेटी आणि तपासण्या नियमितपणे घेण्यात येत आहेत.”

जिल्हा शल्यचिकित्सक **डॉ. वर्षा डोईफोडे** यांनी जिल्ह्यातील नागरिकांना आवाहन केले की, कोणतेही सोनोग्राफी केंद्र कायद्याचे उल्लंघन करत असल्यास किंवा अनधिकृत गर्भलिंग निदान होत असल्यास तात्काळ तक्रार करावी. तक्रारीसाठी www.amchimulgimaha.in संकेतस्थळ, हेल्पलाइन १८००-२३३-४४७५ किंवा १०४ क्रमांक उपलब्ध आहेत.

या भेटीदरम्यान जिल्हास्तरीय अधिकारी आणि संबंधित सोनोग्राफी केंद्रांचे डॉक्टर उपस्थित होते. ही मोहीम मुलींच्या जन्मसंख्येचे संरक्षण आणि कायद्याचे पालन सुनिश्चित करण्याच्या दृष्टीने महत्त्वपूर्ण मानली जात आहे.

KDM NEWS प्रतिनिधी