**आयुक्त तुकाराम मुंडेंचा परंड्यात पहाटेच 'सर्जिकल स्ट्राइक'! १ कोटी २ लाखांचा प्रतिबंधित गुटखा जप्त, गोदामे सील**

**आयुक्त तुकाराम मुंडेंचा परंड्यात पहाटेच 'सर्जिकल स्ट्राइक'! १ कोटी २ लाखांचा प्रतिबंधित गुटखा जप्त, गोदामे सील** 

**KDM NEWS प्रतिनिधी परंडा (जि. धाराशिव), ६ जून २०२६ :** अन्न व औषध प्रशासनाचे आयुक्त तुकाराम मुंडे यांच्या थेट आदेशानुसार शुक्रवारी (५ जून) पहाटे ५ वाजता परंडा शहरात एफडीएच्या पथकाने एकाच वेळी चार ठिकाणी धाडी टाकून १ कोटी २ लाख रुपयांचा प्रतिबंधित गुटखा जप्त केला. गोदामे सील करण्यात आले असून, कारवाईच्या भीतीने शहरातील सर्व पानटपऱ्या आणि संबंधित दुकाने दिवसभर बंद राहिली.

मुंडे आणि सह-आयुक्त श्रीकांत करकाळे यांना परंड्यात मोठ्या प्रमाणात गुटख्याचा साठा असल्याची गोपनीय माहिती मिळाली होती. त्यानुसार सांगली, पुणे, धाराशिव आणि सोलापूर येथील एफडीए अधिकाऱ्यांच्या विशेष पथकाने अत्यंत गोपनीयरित्या ही कारवाई आखली. स्थानिक यंत्रणांना ऐनवेळी कळवण्यात आले, ज्यामुळे कारवाई पूर्णपणे आश्चर्यकारक ठरली.

**बावची चौक परिसरात तीन गोदामांवर धाड :** येथे १ कोटी १ लाख ८८ हजार ५०८ रुपयांचा गुटखा जप्त झाला. बस स्थानक रोडवरील एका बेकरीजवळील ठिकाणी अतिरिक्त ७८,७५५ रुपयांचा गुटखा सापडला. जप्त केलेला सर्व मुद्देमाल परंडा पोलिस ठाण्यात हस्तांतरित करण्यात आला असून, गुन्हा दाखल करण्याची प्रक्रिया सुरू आहे.

या कारवाईत सहायक आयुक्त प्रमोदकुमार काकडे, संतोष सावंत, डॉ. सुमित खांडेकर, वीर स्वामी, उमेश भुसे, धनंजय आगाव, रोहित फंदी, गणेश दत्तू, अभिजित झोडगे, ऋषिकेश मते यांच्यासह परंडा पोलिसांचा ताफा सहभागी होता. जप्त गुटखा इतका मोठा होता की, त्यासाठी टेम्पोची दोन फेऱ्या मारावी लागली.

**तपास सुरू :** गुटखा कोणाचा आहे, गोदामे कोणाच्या मालकीची आहेत, भाडेतत्त्वावर दिली होती का, यासह मुख्य पुरवठादार आणि माफियांचा शोध घेण्यात येत आहे. मुंडे यांच्या नेतृत्वात राज्यभर गुटखा, पानमसाला आणि भेसळीविरोधात सातत्याने धडक कारवाया सुरू आहेत.

या सर्जिकल स्ट्राइकमुळे परंड्यात गुटखा माफियांच्या फाळ्यात दहशत पसरली असून, आरोग्याशी खेळणाऱ्यांना कठोर धडा मिळाला आहे. आयुक्त मुंडे यांच्या ‘सेफ फूड, सेफ ड्रग, सेफ महाराष्ट्र’ मोहिमेचा हा भाग आहे.

KDM NEWS प्रतिनिधी