**सोलापूरच्या विकासाला 'बुस्टर डोस': उड्डाणपूल, पाणीपुरवठा आणि आयटी पार्कसह अनेक महत्त्वाचे निर्णय**

**सोलापूरच्या विकासाला 'बुस्टर डोस': उड्डाणपूल, पाणीपुरवठा आणि आयटी पार्कसह अनेक महत्त्वाचे निर्णय** 

**KDM NEWS प्रतिनिधी सोलापूर,:** सोलापूर शहराच्या दीर्घकाळ प्रलंबित विकास प्रकल्पांना लवकरच गती मिळणार असून, मुख्यमंत्री देवेंद्र फडणवीस यांच्या अध्यक्षतेखालील उच्चस्तरीय बैठकीत उड्डाणपूल, १,४०० कोटींची अंतर्गत पाणीपुरवठा योजना, आयटी पार्क आणि विमानसेवा यासह अनेक महत्त्वाचे निर्णय घेण्यात आले आहेत. 

बैठकीत दोन्ही उड्डाणपुलांसाठी रेल्वे, पोस्ट आणि शासकीय जागांचा प्रश्न १५ दिवसांत सोडवून ऑगस्टपूर्वी वर्क ऑर्डर देण्याचे निर्देश देण्यात आले. शासकीय जागा विनामूल्य देण्यासाठी मंत्रिमंडळास प्रस्ताव सादर करण्यात येणार आहे. पालकमंत्री जयकुमार गोरे यांनी सांगितले की, यामुळे पुढील दीड-दोन महिन्यांत प्रत्यक्ष काम सुरू होईल. 

शहरातील अंतर्गत पाणीपुरवठा योजनेसाठी १,४०० कोटींच्या प्रकल्पाची निविदा १५ सप्टेंबरपर्यंत काढून ३० नोव्हेंबरपूर्वी वर्क ऑर्डर देण्याचे निर्देश देण्यात आले. पाकणी जलशुद्धीकरण प्रकल्पावरील अडथळे दूर झाले असून, केंद्राकडे प्रस्ताव पाठवण्यात आला आहे. शहराला २४ तास पाणीपुरवठा सुनिश्चित करण्यासाठी ही योजना प्राधान्याने राबवली जाणार आहे. 

आयटी पार्कसाठी जलसंपदा विभागाची जागा सात दिवसांत विनामूल्य उपलब्ध करून देण्याचा निर्णय घेण्यात आला. मुख्यमंत्री फडणवीस यांनी संबंधित अधिकाऱ्यांना तातडीने कार्यवाही करण्याचे आदेश दिले. 

सोलापूर विमानसेवा पूर्ववत सुरू करण्यासाठी कंपनीला नोटीस बजावण्यात येणार असून, नाईट लँडिंग सुविधा, अतिक्रमण हटवणे आणि बोरामणी विमानतळ प्रकल्प यांचाही आढावा घेण्यात आला. १५ ऑगस्टपर्यंत किमान २५ ई-बस उपलब्ध करून देण्याचा प्रयत्न करण्यात येणार आहे. 

महानगरपालिकेतील २४९ रोजंदारी कर्मचारी आणि वाहनचालकांना कोल्हापूर धर्तीवर कायम सेवेत घेण्याचा प्रस्ताव तातडीने मार्गी लावण्याचे निर्देश नगरविकास विभागाला देण्यात आले. 

या बैठकीला पालकमंत्री जयकुमार गोरे, सार्वजनिक बांधकाम मंत्री शिवेंद्रसिंहराजे भोसले, आमदार देवेंद्र कोठे, मुख्य सचिव राजेश अग्रवाल यांसह वरिष्ठ अधिकारी उपस्थित होते. 

पालकमंत्री गोरे म्हणाले, “मुख्यमंत्र्यांनी घेतलेले हे निर्णय सोलापूरच्या विकासातील मैलाचे दगड ठरतील.” आमदार देवेंद्र कोठे यांनीही या निर्णयांचे स्वागत करताना शहराच्या दैनंदिन समस्यांना लवकरच तोडगा मिळेल, असे सांगितले. 

या निर्णयांमुळे सोलापूरच्या पायाभूत सुविधा, पाणी, रोजगार आणि वाहतूक क्षेत्रात लक्षणीय सुधारणा होण्याची अपेक्षा आहे.

KDM NEWS प्रतिनिधी