**लातूरच्या निलंग्यात सावकारीचा भयावह प्रकार: मित्रासाठी जामीन राहिल्याने दीड लाखांच्या कर्जापायी गमावली सव्वा कोटींची पाच एकर जमीन**

**लातूरच्या निलंग्यात सावकारीचा भयावह प्रकार: मित्रासाठी जामीन राहिल्याने दीड लाखांच्या कर्जापायी गमावली सव्वा कोटींची पाच एकर जमीन** 

**KDM NEWS प्रतिनिधी नणंद (लातूर):** मित्राच्या आर्थिक अडचणीमुळे जामीनदार राहणे एका तरुण शेतकऱ्याला चांगलेच भोवले. खासगी सावकाराने अवघ्या दीड लाख रुपयांच्या कर्जासाठी सव्वा कोटी रुपयांची पाच एकर शेती बळकावली. हा धक्कादायक प्रकार लातूर जिल्ह्यातील निलंगा तालुक्यातील नणंद गावात उघडकीस आला आहे. पीडिताचे नाव पुंडलिक भोसले आहे.

पुंडलिक भोसले यांच्या एका मित्राने चार वर्षांपूर्वी खासगी सावकाराकडून दीड लाख रुपये कर्ज घेतले. पुंडलिक यांनी या कर्जासाठी जामीनदार म्हणून स्वाक्षरी केली. मित्राने कर्ज वेळेत फेडले नाही. त्यामुळे सावकाराने जामीनदार पुंडलिक यांच्यावर दबाव टाकला. व्याजावर व्याज लावत कर्जाचा डोंगर इतका वाढवला की, पुंडलिक यांना नाईलाजाने आपली पाच एकर शेती (अंदाजे सव्वा कोटी रुपये किंमत) सावकाराच्या नावावर रजिस्टर करून द्यावी लागली.

जमीन सावकाराच्या नावावर केल्यानंतरही सावकाराचा तगादा थांबला नाही. त्याने अजून ७० ते ८० लाख रुपये व्याज बाकी असल्याचा दावा करत भोसले कुटुंबीयांना सतत त्रास दिला. याप्रकरणी निलंगा पोलीस ठाण्यात गुन्हा दाखल झाला आहे, मात्र अद्याप कोणत्याही आरोपीला अटक झालेली नाही. कागदोपत्री व्यवहार कायदेशीर दाखवून पोलिस कारवाई टाळली जात असल्याचा पीडितांचा आरोप आहे.

**नातेवाईकांनाही झाला त्रास**  

पुंडलिक यांना मदत करण्यासाठी नातेवाईकांनी जामीनदारी स्वीकारली. त्यांनी ३० ते ४० लाख रुपये दिले आणि साडेतीन एकर अतिरिक्त जमीन सावकाराच्या नावावर केली. तरीही सावकार समाधानी झाला नाही. उलट, नातेवाईकांना मारहाण करण्यात आली आणि तीन दिवस बेकायदेशीरपणे डांबून ठेवल्याचा गंभीर आरोप आहे.

**गाव सोडले २०-२२ कुटुंबे**  

या सावकाराच्या जाचाला कंटाळून नणंद गावातील २० ते २२ कुटुंबे गाव सोडून गेल्याची माहिती समोर आली आहे. सावकार १ लाख रुपये तीन महिन्यांसाठी ५ टक्के मासिक व्याजाने देतो. दोन जामीनदार घेतो. मुदत संपल्यावर दररोज हजारो रुपयांचा दंड लावतो. शिवीगाळ, धमक्या आणि मारहाण करून दबाव आणतो. कर्ज फेडता न आल्यास दुसऱ्या सावकाराकडून पैसे आणून चक्रवाढ व्याजात अडकवतो आणि शेवटी जमिनी हडप करतो.

हा प्रकार शेतकऱ्यांच्या जीवित्वावर आणि जमिनीवर होणाऱ्या सावकारी हल्ल्याचे उघडे दर्शन घडवतो. प्रशासन आणि पोलिसांकडून तातडीने कठोर कारवाईची मागणी पीडित कुटुंबीय करत आहेत.

KDM NEWS प्रतिनिधी