**अवैध वाळू वाहतुकीचा भांडाफोड; करमाळा पोलिसांनी टिपरसह दोन आरोपींना अटक केली**

**अवैध वाळू वाहतुकीचा भांडाफोड; करमाळा पोलिसांनी टिपरसह दोन आरोपींना अटक** 

**KDM NEWS प्रतिनिधी**करमाळा, २७ ऑक्टोबर २०२५** – सोलापूर जिल्ह्यातील करमाळा तालुक्यात उजनी धरणाच्या पाणलोट क्षेत्रात अवैध वाळू वाहतूक करणाऱ्या टिपरला पोलिसांनी पकडले. याप्रकरणी दोन आरोपींवर पर्यावरण संरक्षण कायद्यांतर्गत गुन्हा दाखल करण्यात आला असून, सुमारे १७ लाख १४ हजार रुपयांचा मुद्देमाल जप्त करण्यात आला आहे. ही कारवाई रविवारी दुपारी ३.४० वाजता कंदर ते वडशीवणे रोडवरील पवार वस्ती येथे करण्यात आली.

पोलीस निरीक्षक रणजित माने यांच्या मार्गदर्शनाखाली हायवे बिट मदतणीस पोलीस नाईक राजेंद्र ज्योतीराम मेहेर (वय ३५) यांच्या पथकाने गोपनीय माहितीच्या आधारे ही कारवाई केली. पथकात पोलीस हवालदार सुशीलकुमार पाखरे, पोलीस हेड कॉन्स्टेबल १७९६ पठाडे आणि चापोसी २२२१ घुगे यांचा समावेश होता. खाजगी वाहनाने पाहणी करताना कंदर गावाकडून वडशीवणे कडे येणाऱ्या पिवळ्या रंगाच्या आयशर कंपनीच्या छोट्या टिपरला (आरटीओ पासिंग क्रमांक एमएच ४२ बीएफ ४४४०) हाताचा इशारा देऊन थांबवले. टिपरच्या मागील भागात तपासणी केली असता त्यात अंदाजे २ ब्रास वाळू भरलेली आढळली.

टिपर चालकाने स्वतःचे नाव अर्थव सोमनाथ खानेवालकर (वय १९, रा. इंदापूर, जि. पुणे) असे सांगितले. वाळू कोठून आणली याबाबत चौकशी केली असता, प्रेम रमेश काशीद (रा. इंदापूर) यांच्या सांगण्यावरून इंदापूर येथून वाळू भरून आणल्याचे कबूल केले. मात्र, वाळू वाहतूक परवाना किंवा रॉयल्टी नसल्याचे उघड झाले. टिपरची किंमत १७ लाख रुपये तर वाळूची किंमत १४ हजार रुपये अशी एकूण १७ लाख १४ हजार रुपयांचा मुद्देमाल जप्त करण्यात आला.

आरोपी अर्थव सोमनाथ खानेवालकर आणि प्रेम रमेश काशीद यांच्यावर पर्यावरण अधिनियम १९८६ चे कलम १५ आणि ९, तसेच भारतीय न्याय संहिता २०२३ चे कलम ३(५) आणि ३०३(२) अंतर्गत गुन्हा दाखल करण्यात आला आहे. पर्यावरणाचा ऱ्हास होईल हे माहीत असतानाही स्वार्थासाठी अवैध वाळू वाहतूक केल्याचा आरोप आहे. फिर्यादी राजेंद्र मेहेर यांचा जबाब संगणकावर टंकलिखित करून घेण्यात आला असून, तो बरोबर असल्याचे त्यांनी सांगितले.

पोलीस ठाण्यात गुन्हा क्रमांक ०८८५/२०२५ नोंदवला असून, प्रथम खबर अहवाल रात्री १०.१७ वाजता दाखल करण्यात आला. माहिती पोलीस ठाण्यात रात्री ९.१० वाजता मिळाली होती. ठाणे दैनंदिनी नोंद क्रमांक ०४५ मध्ये याचा उल्लेख आहे. पोलीस अधिक तपास करीत असून, अवैध वाळू माफियांच्या विरोधात कठोर कारवाई सुरू असल्याचे पोलीस निरीक्षक माने यांनी सांगितले. उजनी धरण परिसरात अशा कारवाया वाढवण्यात येणार असल्याचेही त्यांनी नमूद केले.

KDM NEWS प्रतिनिधी