**बायोटेक क्षेत्रात महाराष्ट्राची मोठी झेप!डॉ. बाबासाहेब आंबेडकर तंत्रशास्त्र विद्यापीठात स्टेट-ऑफ-द-आर्ट लॅबसाठी बायोएराशी करार**

**बायोटेक क्षेत्रात महाराष्ट्राची मोठी झेप!

डॉ. बाबासाहेब आंबेडकर तंत्रशास्त्र विद्यापीठात स्टेट-ऑफ-द-आर्ट लॅबसाठी बायोएराशी करार** 

**KDM NEWS प्रतिनिधी**लोणेरे (रायगड), १७ नोव्हेंबर २०२५ *महाराष्ट्राच्या उच्च व तंत्रशिक्षण क्षेत्राला बायोटेक्नॉलॉजी आणि लाइफ सायन्सेसच्या क्षेत्रात आघाडीवर नेण्याच्या दृष्टीने डॉ. बाबासाहेब आंबेडकर तंत्रशास्त्र विद्यापीठ, लोणेरे आणि पुण्यातील बायोएरा लाइफ सायन्सेस प्रा. लि. यांच्यात आज अत्याधुनिक ‘स्टेट-ऑफ-द-आर्ट बायोसायन्सेस अँड टेक्नॉलॉजी रिसर्च–इन्क्युबेशन लॅबोरेटरी’ स्थापन करण्याचा महत्त्वपूर्ण सामंजस्य करार (MoU) झाला.

महाराष्ट्राचे उच्च व तंत्रशिक्षण मंत्री चंद्रकांत दादा पाटील यांच्या प्रमुख उपस्थितीत हा करार स्वाक्षरी कार्यक्रम मुंबई येथे पार पडला. या लॅबमुळे विद्यापीठातील संशोधक, विद्यार्थी आणि स्टार्टअप्सना जागतिक दर्जाच्या सुसज्ज सुविधा उपलब्ध होणार असून बायोफार्मास्युटिकल्स, जेनेटिक इंजिनिअरिंग, मॉलिक्युलर डायग्नोस्टिक्स, बायोइन्फॉरमॅटिक्स आणि बायोप्रोसेस टेक्नॉलॉजी या क्षेत्रांत क्रांतिकारी संशोधनाला चालना मिळणार आहे.

या लॅबोरेटरीत खालील सुविधांचा समावेश असेल:  

- हाय-थ्रूपुट जीन सिक्वेंसिंग (NGS) आणि बायोइन्फॉरमॅटिक्स सेंटर  

- अत्याधुनिक सेल कल्चर आणि स्टेम सेल रिसर्च सुविधा  

- प्रोटिओमिक्स आणि मेटाबॉलॉमिक्स लॅब  

- GLP प्रमाणित मायक्रोबायोलॉजी आणि इम्युनॉलॉजी लॅब  

- बायोप्रोसेस इंजिनिअरिंग आणि फर्मेंटेशन टेक्नॉलॉजी युनिट  

- स्टार्टअप इनक्युबेशन स्पेस आणि इंडस्ट्री मेंटॉरशिप प्रोग्राम  

या करारामुळे विद्यापीठातील बी.टेक (बायोटेक्नॉलॉजी), एम.टेक आणि पीएच.डी. स्तरावरील विद्यार्थ्यांना प्रत्यक्ष इंडस्ट्री प्रकल्पांवर काम करण्याची संधी मिळेल तसेच बायोएरा कंपनीच्या तज्ज्ञ मार्गदर्शनाखाली संशोधन करता येईल. याशिवाय राज्यातील इतर विद्यापीठांच्या विद्यार्थ्यांनाही या सुविधेचा लाभ घेता येणार आहे.

कार्यक्रमाला उच्च व तंत्रशिक्षण विभागाचे अतिरिक्त मुख्य सचिव बी. वेणुगोपाल रेड्डी, डॉ. बाबासाहेब आंबेडकर तंत्रशास्त्र विद्यापीठाचे कुलगुरू कर्नल प्रा. कारभारी व्ही. काळे, बायोएरा लाइफ सायन्सेसचे कॉर्पोरेट डायरेक्टर सिद्धार्थ सालुंके, मुंबई विद्यापीठाचे कुलगुरू प्रा. रवींद्र कुलकर्णी, सावित्रीबाई फुले पुणे विद्यापीठाचे प्र-कुलगुरू प्रा. संजीव सोनवणे, शिवाजी विद्यापीठाचे कुलगुरू डॉ. दिगंबर शिर्के यांच्यासह राज्यातील दहापेक्षा अधिक विद्यापीठांचे कुलगुरू, प्र-कुलगुरू आणि वरिष्ठ अधिकारी उपस्थित होते.

चंद्रकांत पाटील यांनी आपल्या भाषणात म्हणाले, “महाराष्ट्राला बायोटेक्नॉलॉजी हब बनवायचे आहे. या लॅबमुळे केवळ संशोधन नव्हे तर रोजगार निर्मिती आणि स्टार्टअप इकोसिस्टिमला मोठा फायदा होईल. पुढील पाच वर्षांत राज्यात अशा दहा अत्याधुनिक लॅब उभारण्याचा सरकारचा मानस आहे.”

बायोएरा कंपनीचे सिद्धार्थ सालुंके यांनी सांगितले की, “पहिल्या टप्प्यात १२००० चौरस फूट क्षेत्राच्या या लॅबसाठी सुमारे २५ कोटी रुपये गुंतवणूक केली जाईल. २०२६ अखेरपर्यंत ही लॅब पूर्णपणे कार्यान्वित होईल.”

या सामंजस्य करारामुळे महाराष्ट्र राज्य बायोटेक्नॉलॉजी आणि लाइफ सायन्सेस संशोधनात देशात अव्वल स्थान मिळवण्याच्या दिशेने एक पाऊल पुढे पडले आहे.

KDM NEWS प्रतिनिधी