**सोलापूरची मेघा शिवगुंडे यांना राज्यस्तरीय ‘महाराष्ट्र नारीशक्ती समाजरत्न’ पुरस्काराने गौरवनिधी**

**सोलापूरची मेघा शिवगुंडे यांना राज्यस्तरीय ‘महाराष्ट्र नारीशक्ती समाजरत्न’ पुरस्काराने गौरवनिधी** 

**KDM NEWS प्रतिनिधी** सोलापूर** – महावितरण कंपनीच्या सोलापूर परिमंडळातील गुरुनानक नगर उपविभागाच्या कनिष्ठ अभियंता मेघा अशोक शिवगुंडे यांना त्यांच्या कर्तव्यदक्षता, ग्राहकसेवेतील उत्कृष्ट कामगिरी आणि थकबाकी वसुलीतील यशस्वी नेतृत्वासाठी राज्यस्तरीय ‘महाराष्ट्र नारीशक्ती समाजरत्न आदर्श पुरस्कार-२०२५’ प्रदान करण्यात आला. पुण्यातील यशवंतराव चव्हाण नाट्यगृहात एन.डी. फाऊंडेशनच्या वतीने आयोजित भव्य समारंभात राज्यभरातील निवडक १२५ महिलांचा सत्कार करण्यात आला, त्यात सोलापूरच्या मेघा शिवगुंडे यांचा प्रथम क्रमांकाने समावेश आहे.

महावितरणमध्ये २०१८ पासून सेवा देत असलेल्या मेघा शिवगुंडे या सोलापूर शहरातील गुरुनानक नगर, विजयपुर रोड, दिनकरनगर आदी भागातील सुमारे १८ हजार वीजग्राहकांच्या सेवेची जबाबदारी सांभाळतात. गेल्या तीन वर्षांत त्यांनी उपविभागाचे थकबाकी वसुलीचे वार्षिक उद्दिष्ट सलग १०० टक्क्यांपेक्षा जास्त पूर्ण केले आहे. सध्या त्यांच्या उपविभागाची एकूण थकबाकी केवळ ४.८ कोटींवर आणली असून, तीही सोलापूर शहरातील सर्वात कमी थकबाकी मानली जाते.

विशेष बाब म्हणजे मेघा यांचे वडील अशोक शिवगुंडे हे महाराष्ट्र राज्य विद्युत मंडळात (आता महावितरण) तब्बल ४० वर्षे उपअभियंता म्हणून उत्कृष्ट सेवा बजावून २०१६ मध्ये निवृत्त झाले होते. वडिलांचा वारसा पुढे नेण्याची प्रेरणा घेऊन मेघा या आज महावितरणमध्ये आदर्श अधिकारी म्हणून ओळखल्या जातात. वडिलांच्या निधनानंतरही त्यांनी खचून न जाता अधिक जोमाने कामाला जुंपले आहे.

या पुरस्काराचे पारितोषिक म्हणून रोख रक्कम, सन्मानचिन्ह, सन्मानपत्र आणि प्रशस्तीपत्र देण्यात आले. समारंभात प्रमुख पाहुणे म्हणून राज्याच्या महिला व बालकल्याण विभागाच्या वरिष्ठ अधिकाऱ्यांसह पुण्याचे महापौर मुरलीधर मोहोळ, खासदार मेधा कुलकर्णी आदी मान्यवर उपस्थित होते.

KDM NEWS प्रतिनिधी