**महाराष्ट्रात NEP आणि विकसित महाराष्ट्र २०४७ साठी उच्चशिक्षण क्षेत्राचा मेगा रिव्ह्यू; चंद्रकांत पाटील यांचे ठोस निर्देश**
**महाराष्ट्रात NEP आणि विकसित महाराष्ट्र २०४७ साठी उच्चशिक्षण क्षेत्राचा मेगा रिव्ह्यू; चंद्रकांत पाटील यांचे ठोस निर्देश**
**KDM NEWS प्रतिनिधी**मुंबई | प्रतिनिधी | १७ नोव्हेंबर २०२५**मुंबई विद्यापीठाच्या विस्तारित कॉन्सिल हॉलमध्ये आज उच्च व तंत्र शिक्षण मंत्री चंद्रकांत पाटील यांच्या अध्यक्षतेखाली राष्ट्रीय शैक्षणिक धोरण (NEP 2020) ची प्रभावी अंमलबजावणी आणि विकसित महाराष्ट्र २०४७ च्या संदर्भात महत्त्वपूर्ण आढावा बैठक पार पडली. राज्यातील सर्व कुलगुरू, प्र-कुलगुरू आणि उच्चशिक्षण विभागाचे वरिष्ठ अधिकारी एकत्र आल्याने ही बैठक महाराष्ट्राच्या उच्चशिक्षण क्षेत्रातील टर्निंग पॉईंट ठरली.
बैठकीत महाराष्ट्राच्या उच्चशिक्षण संस्थांना जागतिक स्तरावर नेऊन ठेवण्यासाठी ठोस धोरणात्मक निर्णय घेण्यात आले. यात विद्यार्थ्यांना भविष्यकालीन रोजगारक्षम कौशल्ये (Future-ready Skills) देणे, राज्यातील145 विद्यापीठे आणि हजारो महाविद्यालये NIRF, QS World University Rankings, Times Higher Education यासारख्या रँकिंगमध्ये आघाडीवर आणणे, संशोधन गुणवत्ता वाढवणे आणि डिजिटल इन्फ्रास्ट्रक्चर मजबूत करणे आदी मुद्द्यांवर सखोल चर्चा झाली.
**मंत्री चंद्रकांत पाटील यांचे ठोस निर्देश :**
- सर्व विद्यापीठांनी NEP डॅशबोर्ड १०० टक्के वेळेत पूर्ण करणे बंधनकारक.
- प्रत्येक विद्यापीठासाठी उच्चशिक्षण विभागातर्फे किमान दोन सदस्यांचे स्वतंत्र पथक नेमले जाणार. हे पथक प्रत्यक्ष विद्यापीठात भेट देऊन डॅशबोर्डवरील माहितीची तपासणी करेल, त्रुटी दाखवेल आणि मार्गदर्शन करेल.
- डॅशबोर्डवरील आकडेवारी पूर्णपणे निर्दोष, अचूक आणि अद्ययावत राहील यासाठी जबाबदारी निश्चित केली जाईल.
- प्रत्येक विद्यापीठाने स्वतःच्या कामकाजाचा नियमित आढावा घ्यावा; दर तीन महिन्यांनी एकात्मिक राज्यस्तरीय रिव्ह्यू बैठक घेतली जाईल.
- विकसित महाराष्ट्र २०४७ च्या संकल्पनेला अनुसरून प्रत्येक विद्यापीठाने पुढील पाच वर्षांचा ठोस कृतीआराखडा (Roadmap) तयार करावा.
- “वंदे मातरम्” राष्ट्रीय गीताला येत्या २०२६ मध्ये १५० वर्षे पूर्ण होत असल्याने सर्व विद्यापीठे व महाविद्यालयांमध्ये वर्षभर विशेष सांस्कृतिक, शैक्षणिक आणि देशभक्तीपर कार्यक्रम आयोजित करावेत.
मंत्री पाटील यांनी स्पष्ट केले की, “रँकिंग सुधारणे हे केवळ आकड्यांचा खेळ नाही तर विद्यार्थ्यांचे भविष्य घडवण्याचे काम आहे. ज्या विद्यापीठांनी आतापर्यंत डॅशबोर्ड पूर्ण केले नाही, त्यांचे कुलगुरू जबाबदार असतील.”
बैठकीला उच्च व तंत्रशिक्षण विभागाचे अपर मुख्य सचिव बी. वेणुगोपाल रेड्डी, तंत्रशिक्षण संचालक डॉ. विनोद मोहितकर, उच्च शिक्षण संचालक डॉ. शैलेंद्र देवळाणकर, कला संचालनालयाचे संचालक डॉ. किशोर इंगळे, उपसचिव प्रताप लुबाळ, सहसचिव संतोष खोरगडे यांच्यासह सावित्रीबाई फुले पुणे विद्यापीठ, मुंबई विद्यापीठ, नागपूर विद्यापीठ, अमरावती विद्यापीठ, कोल्हापूर विद्यापीठ, औरंगाबाद विद्यापीठ, सोलापूर विद्यापीठ, गोंदवाना विद्यापीठ, कवयित्री बहिणाबाई चौधरी उत्तर महाराष्ट्र विद्यापीठ आदी सर्व विद्यापीठांचे कुलगुरू व प्र-कुलगुरू उपस्थित होते.
या बैठकीनंतर महाराष्ट्र उच्चशिक्षण क्षेत्रात गती आणि पारदर्शकता येणार असून पुढील तीन महिन्यांतच डॅशबोर्ड पूर्णत्व आणि रँकिंग सुधारण्याच्या दृष्टीने मोठे पाऊल उचलले जाणार असल्याचे सूत्रांनी सांगितले.
KDM NEWS प्रतिनिधी
टिप्पण्या