**सदनिका घोटाळ्यात क्रीडामंत्री माणिकराव कोकाटे दोषी; दोन वर्षांची शिक्षा कायम, अटक वॉरंट जारी**

**सदनिका घोटाळ्यात क्रीडामंत्री माणिकराव कोकाटे दोषी; दोन वर्षांची शिक्षा कायम, अटक वॉरंट जारी** 

**KDM NEWS प्रतिनिधी नाशिक, १७ डिसेंबर २०२५ : राज्याचे क्रीडा व युवक कल्याणमंत्री ॲड. माणिकराव कोकाटे यांना ३० वर्षांपूर्वीच्या सदनिका गैरव्यवहार प्रकरणात मोठा धक्का बसला आहे. नाशिक जिल्हा व सत्र न्यायालयाने मंगळवारी त्यांना दोषी ठरवत दोन वर्षांचा कारावास आणि ५० हजार रुपये दंडाची शिक्षा कायम ठेवली. या निकालानंतर कोर्टाने अटक वॉरंट जारी केले असून, कोकाटे यांच्यावर कोणत्याही क्षणी अटक होऊ शकते.

    प्रकरणाची पार्श्वभूमी

ही घटना १९९५ ची आहे. नाशिकच्या कॅनडा कॉर्नर भागातील 'व्ह्यू अपार्टमेंट' इमारतीत मुख्यमंत्री स्वेच्छाधिकार योजनेच्या १० टक्के राखीव कोट्यातून अल्पउत्पन्न गटासाठी सदनिका वाटप करण्यात आली होती. माणिकराव कोकाटे, त्यांचे भाऊ विजय कोकाटे, पोपट सोनवणे आणि प्रशांत गोवर्धने या चार जणांनी बनावट दस्तऐवज तयार करून चार सदनिका बळकावल्याचा आरोप आहे.

तत्कालीन राज्यमंत्री तुकाराम दिघोळे यांच्या तक्रारीवरून जिल्हा प्रशासनाने चौकशी केली. प्रथम वर्ग न्यायालयाने फेब्रुवारी २०२५ मध्ये कोकाटे बंधूंना प्रत्येकी दोन वर्षे कारावास व ५० हजार रुपये दंडाची शिक्षा सुनावली होती. या निकालाविरोधात कोकाटे यांनी जिल्हा न्यायालयात अपील दाखल केले होते. मात्र, न्यायाधीश पी. एम. बदर यांच्या न्यायालयाने कनिष्ठ न्यायालयाचा निर्णय कायम ठेवला.

     अटक वॉरंटनंतर रुग्णालयात दाखल

शिक्षा कायम झाल्यानंतर लगेचच कोर्टाने अटक वॉरंट जारी केले. याच दरम्यान कोकाटे यांची प्रकृती अचानक बिघडली आणि ते मुंबईतील लीलावती रुग्णालयात दाखल झाले आहेत. त्यांच्यावर वांद्रे येथील रुग्णालयात उपचार सुरू आहेत. कोकाटे यांच्या वकिलांनी न्यायालयात चार दिवसांची मुदत मागितली आहे.

कोकाटे यांनी या निकालाविरोधात मुंबई उच्च न्यायालयात याचिका दाखल केली असून, १९ डिसेंबर रोजी यावर सुनावणी होणार आहे. उच्च न्यायालयाकडून शिक्षेला स्थगिती मिळेपर्यंत अटकेची कारवाई होऊ शकते.

     आमदारकी व मंत्रिपद धोक्यात

लोकप्रतिनिधी कायद्याच्या कलम ८(३) नुसार, दोन वर्षे किंवा त्याहून अधिक कारावासाची शिक्षा झाल्यास आमदारकी तात्काळ रद्द होते. शिक्षा कायम झाल्यानंतर विधिमंडळ सचिवालयाकडून विधानसभा अध्यक्षांना नोटीस पाठवली जाते. अध्यक्षांकडे अंतिम निर्णय घेण्याचा अधिकार आहे.

कोकाटे हे नाशिकमधून आमदार आहेत. शिक्षेमुळे त्यांची आमदारकी रद्द होण्याची शक्यता आहे, त्यामुळे मंत्रिपदही धोक्यात येईल. महायुती सरकारमध्ये अजित पवार गटाचे हे महत्त्वाचे पद असल्याने राजकीय वर्तुळात खळबळ उडाली आहे. विरोधी पक्षांनी कोकाटे यांचा तात्काळ राजीनामा मागितला आहे.

KDM NEWS प्रतिनिधी