**जेजुरीत विजयी जल्लोषात आगीचा भडका; १६ जण गंभीर जखमी**

**जेजुरीत विजयी जल्लोषात आगीचा भडका; १६ जण गंभीर जखमी** 

**KDM NEWS प्रतिनिधी पुणे, दि. २१  : जेजुरी नगरपरिषद निवडणुकीच्या निकालानंतर विजयी उमेदवार आणि कार्यकर्त्यांच्या जल्लोषात खंडोबा गडाच्या पहिल्या पायरीवर भंडारा अर्पण करताना अचानक आगीचा भडका उडून भीषण दुर्घटना घडली. या घटनेत राष्ट्रवादी काँग्रेसच्या दोन नवनिर्वाचित नगरसेविकांसह १६ जण गंभीर भाजले असून, त्यांना तातडीने जेजुरीतील सरकारी आणि खासगी रुग्णालयांत दाखल करण्यात आले. पोलिसांनी घटनास्थळी धाव घेऊन परिस्थिती नियंत्रणात आणली.

घटना दुपारी साडेतीन वाजण्याच्या सुमारास घडली. मल्हार नाट्यगृहात मतमोजणी आणि निकालानंतर राष्ट्रवादीच्या यशस्वी उमेदवारांनी देवदर्शनासाठी गडावर जाण्याचा निर्णय घेतला. पहिल्या पायरीजवळ खंडेरायाच्या चरणी भंडारा अर्पण करताना जळत्या कापरावर भंडारा पडल्याने मोठा स्फोट होऊन आगीचे लोळ उठले. यात महिलांसह अनेक जण होरपळले. प्राथमिक माहितीनुसार, जखमींची संख्या १८ पर्यंत असू शकते, परंतु अधिकृत आकडा १६ आहे.

जखमींमध्ये प्रभाग क्रमांक ५ मधून निवडून आलेल्या नगरसेविका स्वरूपा जालिंदर खोमणे, नगरसेविका मोनिका राहुल घाडगे आणि त्यांचे पती राहुल घाडगे यांचा समावेश आहे. इतर जखमींची नावे अद्याप जाहीर झालेली नाहीत. सर्व जण भाजल्याने गंभीर असून, त्यांच्यावर उपचार सुरू आहेत. घटनेनंतर गडावर गोंधळ उडाला, परंतु पोलिसांच्या तत्परतेमुळे मोठा अनर्थ टळला.

निवडणुकीत राष्ट्रवादी काँग्रेसच्या उमेदवारांचा दणदणीत विजय झाला होता. विजयी मिरवणुकीदरम्यान ही दुर्दैवी घटना घडल्याने परिसरात हळहळ व्यक्त होत आहे. देवस्थान समिती आणि स्थानिक प्रशासनाने जखमींच्या उपचारासाठी मदत जाहीर केली आहे. या अपघाताचे नेमके कारण तपासले जात असून, भविष्यात अशा घटना टाळण्यासाठी उपाययोजना करण्यात येतील, असे अधिकाऱ्यांनी सांगितले.

KDM NEWS प्रतिनिधी