**विहिरीतील मोटार काढताना विद्युत शॉकने बाप-लेकांसह चौघांचा मृत्यू**

**विहिरीतील मोटार काढताना विद्युत शॉकने बाप-लेकांसह चौघांचा मृत्यू** 

**KDM NEWS प्रतिनिधी धाराशिव, दि. २७ : तुळजापूर तालुक्यातील केशेगाव गावात शनिवारी दुपारी एकच्या सुमारास एक हृदयद्रावक घटना घडली. शेतातील विहिरीची दुरुस्ती करताना सबमर्सिबल मोटार काढण्यासाठी वापरलेल्या क्रेनचा उच्च दाबाच्या विद्युत तारांना स्पर्श झाल्याने बाप-लेकांच्या दोन जोड्या असलेल्या चार जणांचा जागीच मृत्यू झाला. या घटनेने संपूर्ण गावात शोककळा पसरली असून, शेतीतील विद्युत सुरक्षेचा मुद्दा पुन्हा ऐरणीवर आला आहे.

केशेगावातील गणपती शिवाप्पा साखरे यांच्या शेतातील विहिरीवर दुरुस्तीचे काम सुरू होते. विहिरीत अडकलेली पाणबुडी मोटार बाहेर काढण्यासाठी क्रेन मागवण्यात आली. काम चालू असताना क्रेनचा लोखंडी भाग वर उचलला गेला आणि दुर्दैवाने शेतावरून जाणाऱ्या उच्च दाबाच्या विद्युत वाहिन्यांना लागला. यामुळे प्रचंड विद्युत प्रवाह क्रेनमध्ये उतरला आणि घटनास्थळी काम करणाऱ्या चार जणांना तीव्र शॉक बसला. त्यांना सावरण्याची संधीही मिळाली नाही आणि जागीच त्यांचा अंत झाला.

मृतांमध्ये शेतकरी नागनाथ काशिनाथ साखरे (वय ५५) आणि त्यांचा मुलगा रामलिंग नागनाथ साखरे (वय ३०) यांचा समावेश आहे. तर मजूर म्हणून काम करणारे कासिम कोंडीबा फुलारी (वय ५४) आणि त्यांचा अवघ्या १६ वर्षांचा मुलगा रतन कासिम फुलारी हेही या अपघातात मृत्युमुखी पडले. रतन हा वडिलांच्या मदतीसाठी आला होता, पण या दुर्दैवी घटनेत त्याचा अंत झाला. मृतांच्या नातेवाईकांचा आक्रोश ऐकून गावकऱ्यांचे काळीज पिळवटून निघाले.

घटनेची माहिती मिळताच अणदूर पोलिस ठाण्याचे कर्मचारी घटनास्थळी दाखल झाले आणि पंचनामा करून मृतदेह ताब्यात घेतले. अपघाताची कारणे तपासण्यासाठी चौकशी सुरू करण्यात आली आहे. महावितरणच्या उच्च दाबाच्या तारांमुळे शेतकऱ्यांना होणारा धोका आणि शेतीकामातील सुरक्षिततेच्या उपाययोजनांवरून ग्रामस्थांमध्ये नाराजी व्यक्त होत आहे.

या घटनेनंतर शेतकरी बांधवांना कळकळीची विनंती आहे की, शेतातील पाणी देण्याच्या कामात डीपीजवळ जाताना काळजी घ्या, फ्यूज टाकताना सावधानता बाळगा आणि विद्युत तारांपासून सुरक्षित अंतर राखा, जेणेकरून अशा दुर्घटना टाळता येतील.

KDM NEWS प्रतिनिधी