**बार्शीत स्व. सुशील-शीतल राऊत स्मृती रक्तदान शिबिराचे आवाहन**

**बार्शीत स्व. सुशील-शीतल राऊत स्मृती रक्तदान शिबिराचे आवाहन** 

**KDM NEWS प्रतिनिधी बार्शी, दि. २० डिसेंबर २०२५** – स्व. सुशील-शीतल राऊत यांच्या स्मरणार्थ गेल्या १४ वर्षांपासून सुरू असलेल्या रक्तदान शिबिरांच्या मालिकेने सामाजिक क्षेत्रात अनोखे योगदान दिले आहे. स्व. सुशील-शीतल राऊत मित्र परिवार आणि जय शिवराय प्रतिष्ठान बार्शी यांच्या वतीने आयोजित या शिबिरांमधून आतापर्यंत एकूण ४,६९५ बाटल्या रक्त संकलित झाले असून, त्यातून १,१२८ अतिशय गरीब आणि गरजू रुग्णांना मोफत किंवा सवलतीच्या दरात रक्त पुरवठा करण्यात आला आहे.

या शिबिरांमध्ये वर्षनिहाय रक्तदानाचा आकडा असा : २०१३ मध्ये २३७, २०१४ मध्ये १७०, २०१५ मध्ये १७५, २०१६ मध्ये २८६, २०१७ मध्ये २५१, २०१८ मध्ये २७१, २०१९ मध्ये ३४१, २०२० मध्ये ४१६, २०२१ मध्ये ३२५, २०२२ मध्ये ४५६, २०२३ मध्ये ४४८, २०२४ मध्ये ४१३ आणि २०२५ मध्ये ३५६ रक्तदात्यांनी सहभाग घेतला. यातून मुख्य शिबिरांमधून ४,१४५ बाटल्या रक्त जमा झाले. याशिवाय, गेल्या १२ वर्षांपासून छत्रपती संभाजी महाराज जयंती (१४ मे) आणि स्वातंत्र्यदिन (१५ ऑगस्ट) निमित्त आयोजित विशेष शिबिरांमधून ५५० बाटल्या रक्त संकलित झाले.

आयोजकांनी सांगितले की, हे संकलन मोफत राखीव कोट्यातून होते, ज्यामुळे गरजू रुग्णांना थेट मदत मिळते. "जगात पैशाने सर्वकाही मिळते, पण रक्त नाही. एका रक्तदानाने एखाद्या गरीबाचा जीव वाचू शकतो आणि शरीर तीन महिन्यांत ते रक्त पुन्हा तयार करते," असे त्यांनी आवाहनात म्हटले आहे.

पुढील रक्तदान शिबिर १ जानेवारी २०२६ रोजी (गुरुवार) सकाळी ८ ते सायंकाळी ७ वाजेपर्यंत क्रिडा भवन, शनी मंदिराजवळ, बार्शी येथे आयोजित करण्यात आले आहे. आयोजकांनी नागरिकांना मोठ्या संख्येने सहभागी होऊन गरजू रुग्णांसाठी मोफत रक्तपुरवठा सुनिश्चित करण्याचे आवाहन केले आहे. "चला रक्तदान करूया, एक श्रेष्ठदान करूया," अशी विनंती त्यांनी केली.

KDM NEWS प्रतिनिधी