**बार्शी तालुक्यात पोलिसांची धडक कारवाई: पिस्तूलसह एकाला अटक, दुसरा फरार**
**बार्शी तालुक्यात पोलिसांची धडक कारवाई: पिस्तूलसह एकाला अटक, दुसरा फरार**
**KDM NEWS प्रतिनिधी बार्शी , दि. २९ : बार्शी तालुका पोलिसांनी गोपनीय माहितीच्या आधारे धडक कारवाई करत एका व्यक्तीला देशी बनावटीच्या पिस्तूल, तीन जिवंत काडतुसे, एक कार आणि दोन मोबाइलसह अटक केली. या प्रकरणी दुसरा आरोपी अंधाराचा फायदा घेऊन पळून जाण्यात यशस्वी झाला. जप्त केलेल्या मुद्देमालाची एकूण किंमत ५ लाख ९५ हजार ६०० रुपये इतकी आहे. ही कारवाई आज पहाटे २ वाजून ३० मिनिटांनी घडली.
बार्शी तालुका पोलिस ठाण्यात गुन्हा क्रमांक ४०१/२०२५ नोंदवण्यात आला असून, शस्त्रास्त्र कायद्याच्या कलम ३ आणि २५ तसेच बीएनएस कलम ३(५) अंतर्गत गुन्हा दाखल करण्यात आला आहे. पोलिस अधीक्षक अतुल कुलकर्णी, अतिरिक्त अधीक्षक प्रितम यावलकर आणि उपविभागीय अधिकारी अशोक सायकर यांच्या मार्गदर्शनाखाली सहाय्यक निरीक्षक दिलीप ढेरे, उपनिरीक्षक बालाजी वळसंग, पोलीस हवालदार सुभाष सुरवसे, बालाजी हांगे, राहुल बोंदर ,गवळी, बचुटे आणि चालक पोलीस हवालदार चिट्ठलवाड यांच्या पथकाने ही कारवाई केली.
पोलिस अधीक्षकांच्या सूचनेनुसार बंदुकीचा धाक दाखवून चोरी, दरोडा आणि घरफोड्या करणाऱ्या गुन्हेगारांवर नजर ठेवण्यात येत होती. पथक सरकारी वाहनाने पेट्रोलिंग करत असताना कुर्डूवाडी बायपास चौकात गोपनीय सूत्रांकडून माहिती मिळाली की, दोन व्यक्ती पांढऱ्या रंगाच्या कारने (क्रमांक एमएच ०८ झेड ७४७५) बार्शी-देवगाव मार्गावरून भूमकडे जात असून, त्यांच्याकडे देशी पिस्तूल आहे.
पथकाने पंचांसह गाडेगाव बायपास येथील साई संजीवनी हॉस्पिटलजवळ सापळा रचला. संशयित कार वेगाने येताच पोलिसांनी पाठलाग करून यमाई मंदिरासमोरील रस्त्यावर गतिरोधकाजवळ अडवली. कारचा चालक वाहन सोडून पळून गेला. पोलिस हवालदार भांगे आणि गवळी यांनी त्याचा पाठलाग केला, मात्र अंधारामुळे तो निसटला. दुसऱ्या आरोपीला पोलिसांनी घेराव घालून पकडले.
अटक आरोपीने आपले नाव अभिजीत चंद्रकांत जाधव (राहणार: गारभवाणी नगर झोपडपट्टी, परांडा, जि. धाराशिव) असे सांगितले. फरार आरोपीचे नाव धीरज कांतिलाल पवार (राहणार: सावदरवाडी, परांडा, जि. धाराशिव) असल्याचे त्याने उघड केले. आरोपीची अंगझडती आणि कारची तपासणी केली असता, एक मोबाइल, कारच्या गिअरजवळ दुसरा मोबाइल आणि डॅशबोर्डच्या कप्प्यात पिस्तूल व तीन जिवंत काडतुसे सापडली.
जप्त मुद्देमालाबाबत पंचनामा करून आरोपीला ताब्यात घेण्यात आले असून, फरार आरोपीचा शोध सुरू आहे. पोलिसांनी अवैध शस्त्र बाळगणे आणि अन्य गुन्ह्यांच्या अनुषंगाने तपास तीव्र केला आहे. ही कारवाई परिसरात अवैध गतिविध्यांवर नियंत्रण आणण्याच्या प्रयत्नांचा भाग आहे.
KDM NEWS प्रतिनिधी
टिप्पण्या