*बार्शी तालुका पोलिसांची कारवाई: क्रूरतेने भरलेल्या टेम्पोमधून ३ जर्सी गाईंची सुटका!*
*बार्शी तालुका पोलिसांची कारवाई: क्रूरतेने भरलेल्या टेम्पोमधून ३ जर्सी गाईंची सुटका!*
**KDM NEWS प्रतिनिधी बार्शी : १० जानेवारी २०२६ :** बार्शी तालुका पोलिसांनी शेंद्री-बार्शी रस्त्यावर एका टेम्पो वाहनातून तीन जर्सी गायींची दाटीवाटीने भरलेली अवैध वाहतूक रोखली. या प्रकरणी चालक दिपक भारत मोरे (राहणार बावी, ता. माढा) आणि नज्जू आदम शेख (राहणार मोडनिंब, ता. माढा) यांना अटकेत घेण्यात आले. जनावरांना क्रूरपणे बांधून कत्तलखान्यात नेण्यात येत असल्याचे उघड झाले असून, प्राणी क्रूरता प्रतिबंधक कायद्यांतर्गत गुन्हा दाखल करण्यात आला.
पोलिस कॉन्स्टेबल आकाश हनुमंत कांबळे यांच्या फिर्यादीनुसार, दुपारी १२.५० वाजता वांगरवाडी बसस्टॉपजवळ गोपनीय माहितीच्या आधारे नाकाबंदी करण्यात आली. महिंद्रा विरो कंपनीच्या निळसर रंगाच्या टेम्पो (क्र. MH45AX1158) ला थांबवून तपासणी केली असता, त्यात दोन काळ्या-पांढऱ्या जर्सी गायी (प्रत्येकी १०,००० रुपये किंमत, वय ४ वर्षे, शिंगे असलेल्या) आणि एक काळी जर्सी गाय (१०,००० रुपये किंमत, वय ६ वर्षे, शिंगे नसलेली) आढळल्या. जनावरांना कमी जागेत बांधलेले असून, हालचाल करता येणार नाही अशा स्थितीत ते होते. वाहनात चारा, पाणी किंवा औषधांची कोणतीही व्यवस्था नव्हती.
आरोपींनी जनावरांना मोडनिंब बाजारातून घेऊन धाराशिव कत्तलखान्यात नेण्याचे कबूल केले. परवानगी किंवा कागदपत्रे नसल्याने प्राणी क्रूरता प्रतिबंधक कायदा १९६० च्या कलम ११(१)(a), (f), (h), (l); जनावर परिवहन नियम १९७८ च्या कलम ४७, ५४, ५६; महाराष्ट्र पशुसंरक्षण कायदा १९७६ च्या कलम ५(a), ५(b), ६, ९, ११; आणि महाराष्ट्र पोलिस कायदा १९५१ च्या कलम ११९ अंतर्गत गुन्हा नोंदवण्यात आला. जनावरांसह वाहन (किंमत ३,००,००० रुपये) जप्त करण्यात आले. एकूण मालमत्ता मूल्य ३,३०,००० रुपये.
सहाय्यक पोलीस निरीक्षक दिलीप विष्णू ढेरे यांच्या नेतृत्वात तपास सुरू असून, आरोपींना न्यायालयात हजर करण्यात येईल. अशा अवैध वाहतुकीविरुद्ध पोलिसांची मोहीम तीव्र करण्यात येत आहे.
KDM NEWS प्रतिनिधी
टिप्पण्या