**शिवव्याख्याते, वारकरी परिषदेचे उपाध्यक्ष ह.भ.प. मधुकर महाराज बारुळकर यांचे भीषण अपघातात निधन**

**शिवव्याख्याते, वारकरी परिषदेचे उपाध्यक्ष ह.भ.प. मधुकर महाराज बारुळकर यांचे भीषण अपघातात निधन** 

**KDM NEWS प्रतिनिधी नांदेड : मराठा सेवा संघाचे प्रबोधनकार आणि वारकरी परिषदेचे उपाध्यक्ष, प्रसिद्ध कीर्तनकार व समाजप्रबोधनक शिवश्री मधुकर महाराज बारुळकर यांचा मंगळवारी सिडको नांदेड चौकात (ढवळे कॉर्नर) भीषण अपघातात जागीच मृत्यू झाला. नांदेडहून परतताना भरधाव वेगाने येणाऱ्या टिपरने त्यांच्या वाहनाला जोरदार धडक दिली. अपघात इतका भीषण होता की महाराजांना गंभीर दुखापत होऊन घटनास्थळीच प्राणज्योत मालवली.

बारूळ (ता. कंधार, जि. नांदेड) येथील भूमिपुत्र मधुकर महाराज बारुळकर हे संपूर्ण महाराष्ट्रात समाजप्रबोधन, कीर्तन आणि मराठा समाजाच्या एकतेच्या कामासाठी ओळखले जातात. मराठा सेवा संघाच्या माध्यमातून पुरोगामी विचारांचा प्रचार करणारे आणि वारकरी परिषदेच्या उपाध्यक्षपदावर कार्यरत असलेले महाराज अहोरात्र समाजजागृतीसाठी कार्यरत होते. त्यांच्या अकस्मात निधनाने वारकरी संप्रदाय, मराठा समाज आणि कीर्तन विश्वावर शोककळा पसरली आहे. विविध सामाजिक, धार्मिक आणि राजकीय स्तरांवरून भावपूर्ण श्रद्धांजली वाहण्यात येत आहे. त्यांच्या जाण्याने समाजाला मोठी हानी झाल्याचे मत व्यक्त केले जात आहे.

दरम्यान, महाराष्ट्रात अपघातांचे प्रमाण वाढल्याने मृत्यूचे तांडव सुरूच आहे. पुण्यातही गेल्या काही दिवसांत अनेक भीषण अपघात घडले आहेत. पुणे-सोलापूर महामार्गावर इंदापूर तालुक्यातील लोणी देवकरजवळ टायर फुटल्याने क्रूझर जीप नियंत्रणाबाहेर जाऊन ट्रकशी धडकली. या अपघातात तीन जणांचा जागीच मृत्यू झाला. पुणे-नाशिक, मुंबई-पुणे एक्सप्रेसवे आदी मार्गांवरही वारंवार अपघात होत असल्याने राज्यभरात खळबळ उडाली आहे. महाराष्ट्र सुन्न झाला असून, रस्ते सुरक्षिततेच्या मुद्द्यावर चर्चा सुरू झाली आहे.

महाराज बारुळकर यांच्या निधनामुळे संपूर्ण महाराष्ट्रात शोककळा पसरली असून, त्यांच्या कार्याचा वारसा पुढे नेण्याचे आश्वासन समाजाने दिले आहे. अपघाताची पोलिसांकडून चौकशी सुरू आहे.

KDM NEWS प्रतिनिधी