**भोंदूबाबा अशोक खरात प्रकरणात राज्य महिला आयोग अध्यक्षा रुपाली चाकणकर यांचा राजीनामा; वैयक्तिक कारणांचा हवाला**

**भोंदूबाबा अशोक खरात प्रकरणात राज्य महिला आयोग अध्यक्षा रुपाली चाकणकर यांचा राजीनामा; वैयक्तिक कारणांचा हवाला** 

*KDM NEWS प्रतिनिधी नाशिक : महिलांचे लैंगिक शोषण, बलात्कार व अंधश्रद्धेच्या नावाने फसवणुकीच्या आरोपाखाली १८ मार्चला अटक झालेल्या कॅप्टन अशोक खरात प्रकरणात राज्य महिला आयोगाच्या अध्यक्षा रुपाली चाकणकर यांनी पदाचा राजीनामा दिला आहे. चाकणकर यांनी राजीनामा पत्रात 'वैयक्तिक कारणांमुळे' स्वेच्छेने पद सोडत असल्याचे नमूद केले आहे. हे पत्र मुख्यमंत्री एकनाथ शिंदे व उपमुख्यमंत्री देवेंद्र फडणवीस यांना सादर करण्यात आले आहे.

खरातच्या शिवनिका संस्थान ट्रस्टमध्ये चाकणकर विश्वस्त असून, त्यांचे खरातचे पाद्यपूजन, छत्र धरणे व गुरू म्हणून संबोधल्याचे जुने व्हिडिओ-फोटो व्हायरल झाल्याने मोठा वाद निर्माण झाला होता. विरोधकांनी तीव्र टीका करत तात्काळ राजीनामा किंवा बडतर्फीची मागणी केली होती.

राष्ट्रवादी (अजित गट) नेत्री रुपाली ठोंबरे पाटील यांनी पत्रकार परिषदेत म्हटले, “चाकणकर पदावर राहिल्यास पुरावे नष्ट होण्याची भीती; निष्पक्ष चौकशी अशक्य, राजीनामा द्या.” शिवसेना (उद्धव) नेत्री सुषमा अंधारे, करुणा मुंडे (मंत्रालयासमोर उपोषणाचा इशारा), संभाजीराजे छत्रपती, अंजली दमानिया, विजय वडेट्टीवार, संजय राऊत यांसह अनेक नेत्यांनी नैतिकतेच्या आधारावर राजीनामा मागितला होता. काहींनी पूर्वी तक्रारी दाबण्याचा आरोपही केला.

खरातला २४ मार्चपर्यंत पोलिस कोठडी मिळाली असून, तेजस्विनी सातपुते यांच्या नेतृत्वात एसआयटी कार्यरत आहे. घरातून ५८ अश्लील व्हिडिओ जप्त झाले; आणखी महिलांच्या तक्रारी येत आहेत. राजकीय संबंध तपासले जात आहेत.

KDM NEWS प्रतिनिधी