**सोलापूर : डिजिटल अॅरेस्टच्या भीतीने २१ लाखांची फसवणूक; सायबर पोलिसांची मोठी कारवाई, दिल्लीतील आरोपी अटकेत**

**सोलापूर : डिजिटल अॅरेस्टच्या भीतीने २१ लाखांची फसवणूक; सायबर पोलिसांची मोठी कारवाई, दिल्लीतील आरोपी अटकेत** 

**KDM NEWS प्रतिनिधी सोलापूर**सोलापूर शहर सायबर पोलिसांनी ‘डिजिटल अॅरेस्ट’ या नव्या सायबर फसवणुकीच्या टोळीवर मोठी कारवाई केली आहे. टेलिकॉम अधिकारी, पोलीस आणि सीबीआय अधिकारी बनून नागरिकांना धमकावून लाखो रुपयांची लूट करणाऱ्या टोळीतील एका मुख्य आरोपीला दिल्ली येथून अटक करण्यात आली आहे.

२८ जुलै २०२५ रोजी तक्रारदाराला अनोळखी मोबाईलवरून कॉल आला. स्वतःला टेलिकॉम कंपनीचा अधिकारी म्हणून ओळख देऊन “तुमचा नंबर गैरवापरला जात असून मुंबईतील कुलाबा पोलीस स्टेशनमध्ये गुन्हा दाखल आहे,” असे सांगण्यात आले. नंतर आरोपींनी स्वतःला पोलीस आणि सीबीआय अधिकारी असल्याचे भासवले. बनावट आधारकार्ड, एटीएम कार्ड, अरेस्ट वॉरंट आणि सुप्रीम कोर्टाची नोटीस व्हॉट्सअॅपवर पाठवून तक्रारदाराला ‘डिजिटल अॅरेस्ट’ केल्यासारखे वातावरण निर्माण केले. भीती आणि बदनामीच्या धमकीखाली एकूण २१,२५,१६१ रुपयांची रक्कम वेगवेगळ्या बँक खात्यांमध्ये ट्रान्सफर करून घेतली.

सायबर पोलिसांच्या तांत्रिक तपासात आरोपी दिल्ली येथील राघवेंद्र सिंग (३८) याला १७ मार्च २०२६ रोजी अटक करण्यात आली. चौकशीत त्याचा आणखी एक साथीदार असल्याचे समोर आले असून त्याचा शोध घेतला जात आहे. आरोपीकडून गुन्ह्यात वापरलेला मोबाईल फोन आणि ९.५ लाख रुपये रोख रक्कम जप्त करण्यात आली आहे.

या प्रकरणी भारतीय न्याय संहिता आणि माहिती तंत्रज्ञान कायद्यानुसार गुन्हा दाखल करण्यात आला आहे. पोलीस आयुक्त एम. राजकुमार, पोलीस उपआयुक्त डॉ. अश्विनी पाटील आणि सहायक पोलीस आयुक्त राजन माने यांच्या मार्गदर्शनाखाली सायबर पोलिस पथकाने ही कारवाई केली.

**नागरिकांसाठी सावधानता :**  

‘डिजिटल अॅरेस्ट’ हा सध्या सर्वाधिक प्रचलित सायबर स्कॅम आहे. फोनवर कोणीही पोलीस, सीबीआय किंवा टेलिकॉम अधिकारी बनून पैसे मागितले, भीती दाखवली किंवा वैयक्तिक माहिती मागितली तर ती १००% फसवणूक आहे. अशा कॉलला उत्तर देऊ नका, कोणतीही बँक किंवा वैयक्तिक माहिती शेअर करू नका. त्वरित १९३० राष्ट्रीय सायबर क्राईम हेल्पलाइन किंवा जवळच्या सायबर पोलीस ठाण्यात तक्रार नोंदवा. फोनवर कोणीही ‘अटक’ करू शकत नाही—ही कायदेशीर प्रक्रिया नाही.